17 août 2016 par Tignace

Banjour mes gins, infin nous ov'là au meos d'août avec el' beonne nouvelle qu' les soldes i-seont... outes !

Fini d' faire des rallyes dins tout l' ville et à l'intours, pourménant « Madame » qui cache toudis à les beonnes affaires. Pasque, vu qu'elle n'a pos d' permis, ch'est Bibi qui fait « Jo le Taxi » et qui va tout partout et cha, deux meos par an, tout in f'sant sûr ein après-deîner autant d'étapes qu'i-a au Tour de France.

In puque ed'cha, m' Gertrute n' fait jamais dins l' tir groupé savez, ein queop ch'est pour eine rope, après ch'est pour ein nouvieau sa et l' pire, ch'est pou des sorlets qui doif'tent suife avé l' robe aquatée de l' velle ! L' tournée finie, j' rinte démoli de m' deos rien qu' d'avoir meonter et déquindu de m' carette.

L'éaute jour, dins l' nuévième boutique de l' journée, miraque : m' Gertrute s'a décidé, in vingt minutes, pou deux paires de sorlets. L'eine avé moinse trinte pour-chints, l'éaute moinse chinquante pour-chints. Toute bénaisse de ses affaires, nous v'là dins l' file pou l' caisse dùsque t' passes à confesse pou t' porte-fouèle. Et cha va vite : bonjour, bip, bip, avé leu scanner, puis te mets t' carte pou payer et zou, i sort el' ticket, à r'voir et merci. « Suivant ! »

M' Gertrute a toudis s' manie d' raviser ses tickets, même qu'alfeos cha m'énerfe mais là, s' nez i-a frisé, oh ! drame : les chinquante pour-chints n'aveot'tent pos passé ! Ortour à l' caisse pou l' processieon ein deuxième queop, et cha, pour intinte el' gérante nous raqueonter ses cacoules qu' ch'éteot eine étudiante qui n'aveot pos mis les beonnes étiquettes su les beonnes boîtes. Du queop, m' Gertrute laisseot tout caire et d'mante l' rimboursemint. Alors acoutez ichi ceulle nouvelle affaire : comme ch'éteot payé par carte, on n'aveot droit qu'à ein beon d'achat ! Furieusse qu'elle éteot m' Gertrute, l' moutarte li meonteot à s' nez. Pou calmer l' Vésufe, j'ai dit « I-est beon, j' vas aller in cacher eine paire pour mi. »

J' d'aveos pos vraimint b'soin et bin seûr, elle n'éteot pos in solde mais dins l' rayeon, j'in rieos tout seu : in janvier, v'là eine étape qu'on orf'ra pus !

Tignace