24 août 2016 par Codolette

Bé vingt milliards, i m'in arrife toudis des dreôles, savez !

A l' fin du meos d' juillet, ov'là qu'ein soir, ej' m'orlèfe dins m'lit pour attraper l' drap, et je n' sais pos commint qu' cha s'a fait, mais tout d'ein queop j'ai intindu "Crac" dins m' guénou. Hasard que m' pied i deot avoir pris dins l' couverte. N'allez pos imaginer éaute queosse, ch'est l' vérité vraie... D'ailleurs, j' n'ai pus vu ein heomme dins m' lit d'puis au moins trinte ans.

Du lind'main, comme cha f'seot bin mau, j' vas vir el' docteur, qui m' fait directemint aller à les urginces. Là, ch'est l' début du parcours du combattant ! On m' fait eine radieo... Tertous i sait bin qu'eine radieo du gu'nou, cha n' sert à rien... Tout cha pou dire qu'i n'a rien à mes oches. Bé cha je l' saveos bin, aussineon j' n'areos pu su marcher !

On m' deonne ein rindez-vous chez l'espécialisse : quate jours pus tard. Li, pos d' surprisse, i-orwette l' radieo, et i m' dit ainsin : "Bé on n' veot rien là-d'ssus, z'allez faire ein scanner". Ch'est ainsin que j' m'in vas printe rindez-vous au scanner... dix jours pus tard ! Pour avoir les résultats du scanner, féaut cor ajouter eine sémaine, et comme l' docteur i-éteot parti in vacances (je n' peux pos li in vouloir pour cha), i m' feaut cor attinte cheonq jours pour savoir ed' quoi.

Infin, i m'anneonche que j'ai eine séquoi qui n'va pos à m' "minisse ed' l'intérieur". "Quoi ?" que j' li dis. In réalité, i vouleot parler de m' ménisque interne. J' sus biête alfeos, mais cha, cha n' cang'ra pus. Toujours est-il que cha f'seot d'jà ein meos qu'i-aveot eu l' "Crac"...

Comme ç' docteur-là i n'opère pos, i m' fait printe rindez-vous chez l' chirurgien. Acor eine sémaine à attinte. J'arrife au rindez-vous : "I feaut opérer", qu'i m' dit. On prind rindez-vous, et comme j' li dis qu' cha comminche à faire lommint qu' j'ai mau, i fait ein bieau effort et i m'opère eine sémaine après.

L'opératieon, ch'est ç' qui va l' pus vite : eine beonne démi-heure ! Après cha, eine paire de jours à béquiles, eine paire de s'maines pou qu' les mouv'mints i z'orvienn'tent comme avant. Nous ov'là ichi deux meos après l' "Crac", j'ai l' même guénou que l' bonheomme Mich'lin, et ch'est à peine si j' sais inl'ver les pichoulits qui z'orpouss'tent dins mes graviers.

A m' meote que si j'areos été ein jeueu d' fotbal d'Anderlèque obin d' l'Estandard, j'areos d'jà pouvu queurir à la mi-août, vous n' pinsez pos ?

Allez, à l' prochaine feos pour ein éaute déméprisache ! Et pour cha, je n' vas pos d'voir em' mette à gu'noux !

Codolette