18 janvier 2017 par L' grante vadroule

J'alleos au boutique, comme tous les jours, pou acater m' boustifale. J' porméneos bénaisse, les mains dins mes tasses vu qu'i f'seot freod et que l' vint i chireot.

« Allez, banjour, Nini, te m' mettras ein pain copé, eine tranche d' mutiau et deux d' fromache. Avec, t' peux mette treos tomates, deux porieons et quate puns d' Rongy. »

J' paye et j' rattinds. J' rattinds acore, j' l'orwette, et elle me dit à r'voir.

« Bin, deonne-me mes commissieons. »

« Prinds-les », qu'elle me dit.

« Et dins quoi est-ç' que j' vas les mette ? »

Elle m'esplique qu'i-a eine loi qu' les ménhères du Governemint i-eont pris comme quoi qu' ch'est fini les sas in plastique. On veot qu' ch'est pos eusses qui veont faire les commissieons. I paraît qu' ch'est pasque les baleines et les tortues i l's aval'tent et qu' cha les rind malates. On dit avec qu' cha prind des chintaines d'ainnées pou qu' cha s' décompeosse.

Beon, j' veux bin, mais j' sus là avé m's affaires su l' queomptoir. Gintille, Nini elle me deonne ein cabas pa d'zous l' tape.

Adeon, asteur, l' bouticlier i va d'voir tout mette dins des sas in papier. J' veos d'jà l' tablature. T'acates des peos d' chuque bin fraiques, l' papier i va démêler et tout i va bourreler à tierre. L' pisseon i va ortourner direct dins l' Esqueaut. Les penn'tierres i veont r'déquinte du Meont St Aubert jussqu'au Collèche de Kain.

Les feimmes i veont tout mette dins leu saclet. D'jà qu'eine vaque n'y r'trouèv'reot pos s' viéau, j' peux jimouler ç' qu'i va advénir quand l' GSM va seonner et que l' feimme va d'voir cacher après au mitan d' tout l' fourbi.

J' sus d'accord pou qu'on deonne moins d' sas in plastique, mais je n' s'reos pus mi-même si j' n'areos pos eine séquoi à r'dire. J' trouèfe qu'on areot pu faire cha p'tit z'à p'tit et n' pos tout supprimer in ein queop.

L' grante vadroule