7 juin 2017 par L' grante vadroule

L' fiête des pères i cait l' deusse diminche de juhin. Ç't ainnée, ch'est le onsse. Je l' dis pou l' rappeler à les oubliettes. Ameon des Français, ch'est eine sémaine après. Mais beon, i n' feont jamais comme l's eautes et i-eont toudis été à r'tard, à part pou l' fiête nationale.

À chaque feos, j' sus à l' misère. I feaut offère ein cadeau. Quand j'éteos à l' pétite école, l' maîtresse i busieot à m' plache vu qu' tertous i faiseot l' même bistocache.

Asteur que j' sus grand, j' deonne des cadeaux « utiles ». Quand ch'est treop tcher, j' m'arrinche avé m' frère pou qu'on partache à deux. M' mopère i-a ainsin orchu eine disqueusse, eine treonçonneusse, eine visseusse, eine détapisseusse et plein d'otieus in -eusse. L' dernière feos, ch'teot eine peonceusse. J'aveos fait ein imballache espécial. I-a ouvére, i-a dit ein p'tit merci et rajouté « Acore pour ouvrer... ». J'éteos défoutu et saisi, mais j'ai compris. On l' véyeot foque comme l' ceu qu'i fait tout l'ouvrache à l' maseon.

Adeon, ormis de m' saisissurte, j'ai busié avé m' frère pou trouver eine séquoi qu'i li f'reot vraimint plaisi. L'ainnée d'après, pus d'otieu, mais eine invitatieon à minger ein morcieau et boire ein verre eine séchu, rien qu'à nous eautes treos. In prumier, tout i s'a bin passé. Minger, cha a été vite, mais après... M' mopère i-éteot d' sortie et i-ortrouveot s' jeonesse. L'après-deîner i-a passé d' bistreot in bistreot. À l'écrienne, i-éteot ein p'tit queop pompette. Pou qu' manman i n' se carmousse pos, on li a dit qu'i falleot rintrer. I nous a alors demandé « Est-ce qu'on a bin bu tout ç' qu'on a payé ? »

Ceulle phrase et ç' momint passé insanne i d'meur'tent dins l' famille comme eine des pus belles raminvrances. Et j' peux dire qu'après cha, on a orwettié no mopère avé des yeux pus près du cœur.

L' grante vadroule

Lexique : deusse : deuxième / ameon : chez / bistocache : cadeau à l'occasion d'une fête / otieu : outil / ouvrer : travailler / défoutu : déçu / saisi : surpris / saisissurte : étonnement / à l'écrienne : au soir, au moment de la veillée / carmousser : inquiéter / insanne : ensemble / raminvrance : souvenir