12 juillet 2017 par Catoupi

L' concours Prayez, i dure s'qu'au 31 juillet, adeon, ein p'tit rappel i n' fait pos d' tort !

« A part cha, tout va bin » Ov'là eine espressieon qu'on dit bin souvint. Et on peut dire que ch't'eine espressieon optimisse.

Mais je n' vas pos ichi dév'lopper l' sujet, vu qu' ch'est puteôt à vous-éautes de l' faire, vu que l' Cabaret i-a queusi ceulle espressieon comme sujet imposé pou l' concours Prayez.

Jusse eine paire de rappels du réglemint : i-a eine prumière divisieon, uniqu'mint pou les gins qui n'eont jamais eu d' prumier prix au concours. Dins ceulle divisieon, i-a l' catégorie "chansons" (i feaut fournir el' partitieon obligatoir'mint, même si ch't'ein air connu), l' catégorie "poèmes", et l' catégorie "monologues".

Dins l' deuxième divisieon, tertous i peut participer, même les ceux qui z'eont d'jà eu ein prumier prix (mais pos les gins du Cabaret bin seûr). Et ch'est là qu'i-a ein sujet imposé, que ch't'ein nouvieau tous l'z'ans. On peut présinter eine cancheon, ein poème ou ein monoloque, tout i-est dins l' même catégorie. Adeon, ceulle ainnée, l' sujet ch'est : " A part cha, tout va bin ".

Bin seûr, i feaut écrire ses tesques in patois tournaisien, ch'est l' réglemint. Adeon si vous êtes d'ein villache à eine paire de kilomètes, i feaut bin vérifier vo vocabulaire et vo n'orthographe, par eximpe avec el' glossaire de Lucien Jardez, qu' ch'est comme qui direot l' Larousse ou l' Robert tournaisien (je n' parle pos d' l'éch'fin, vous l'arez adveiné).

Acor eine queosse importante : vous d'vez signer vos œuvres avec ein pseudonyme, comme cha l' jury i n' sait pos qui ç' que ch'est qui-a participé, et ainsin ch'est pus objectif. Et vous d'vez inveyer vos tesques avant l' 31 juillet au local, tous avé l' même pseudonyme.

L' réglemint complet i-est su l' site internet, et aussi à les ferniêtes du local au 54 de l' rue Saint-Martin.

Adeon, n'hésitez pos : à vos pleumes !

Catoupi