19 juillet 2017 par Codolette

Mi, j'attinds tous les s'maines el' Proximag pou lire l'artique du Cabaret Walleon. J'ai toudis du plaisi à lire tous leus cacoules, même si j' sus-t'eine viell' ronchonneusse. Surtout les histoires d' l'Infant d' Tournai, d' Catoupi, d'Pichoulit, du Beos d'chuque, d'Arnitoile, Tignasse, Grante Vadroulle, Anar, et eine paire d'éautes qui z'écrif'tent alfeos.

Mais l' problème, ch'est qu'i feaut aussi orchevoir les éautes pubicités. Et i d'a ein paquet !

Si on met su s'boite à lettes : « pos d' pub », on n'orcheot pos l' Proximag. Si on n' met rien, on orcheot deux kilos d' papiers à mette au conténaires.

El' pire, ch'est que j' sus dins ein immeupe à appartemints. Et j' sus-t-au rez-d'-chaussée. Comme tertous i-a des boîte à lettes aussi p'tites que m' vessie, l' ceu qui met les pubicités i dépeosse tout su m' n' appuie-d'ferniête. Si j' laiche tout là, avé l' vent ou l' plouèfe, cha va s'ortrouver par tierre.

Adeon, j' sus prope avec cha, i m' feaut ramasser tous les pubicités des éautes locataires pou les mette aux conténaires. Ah ! mais, j' n'ai pos qu' cha à faire, savez !

M' visin, qui-a déménagé i-a d'jà six meos,et que s' maseon elle est toudis inoccupée, i-orcheot tous les s'maines les pubicités, et cha s' termine su l' rue.

Adeon, ces madames et ces mossieus qui mettez les pubicités, j' sais bin qu' ch'est ein traval comme ein éaute, et qu' vous avez bramint d' mérite à l' faire, mais sivouplét, i-a des momints qu'i feaut réfléchir eine milette avant d' mette l' paquet n'importe dù.

À l'orvoyure pour ein éaute déméprisache !

Codolette