23 août 2017 par Arnitoile

Leray l'a dit dins les guerres de la France. Vous connissez ces meots, les prumiers d'no n'hymne national « Les Tournaisiens sont là ». Adolphe Leray, ch't'ein des prumiers cancheonniers tournaisiens, né et décédé au dix-nuévième sièque. I-a écrit in français et in patois. On conneot acore aujord'hui eine paire de ses cancheonnes comme « Jésus passant par Tournai », « Mad'moizelle Brindamante », « Cheoncq Clotiers » ou « Sainte Catherine ».

I-éteot tell'mint célèpe que pos mouins d' treos ans après qu'i-a r'tourné s' brouette, on li inaugureot ein molumint à l' plache du Becquerelle in mil huit chint quater-vingt huit. Malhureus'mint, l' buste i-a été volé in deux-mille treos, seûr'mint pos par ein collectionneur tournaisien mais puteôt par des orvindeux d' métal. Hureus'mint qu'i resteot ein moule in plâte au musée d' folklore et qu'on a pu in r'faire eine copie.

On a inauguré l' nouvieau buste au meos d' juin, in présince du Cabaret Walleon qui-a orpris des estraits d' ses cancheonnes. Et cha pasqu'on a inauguré l' rénovatieon des quais saint-Brice et Dumon et de l' plache du Becquerelle. Pour eine feos on a fait eine séquoi d' bieau ; i-a eine belle pourménate l' leong d' l'Esquéaut avé ein dallache in pierre bleue, comme su l' rife gauche. Su les trottoirs l' leong des maseons i-a des pavés traditionnels, et pou l' voirie pou les carettes des p'tits pavés in queue d' paon. Tout cha avé des arbusses et eine paire d'arpes.

Tout i-est bin délimité ; on sait dùsqu'elle est l' plache pou les piéteons et dùsqu'elle est l' plache pou les carettes. Au mouins ch'est clair et net comme clarinette. Ch'est chint feos mieux qu' dins les rues au riche fil d'or près de l' cathédrale.

Et on a pinsé à les véleos. I-a d'z'indreots, l' bordure elle a été rabaissée. Ainsin asteur ch'est facile d' passer du quai Saint-Brice pour aller rouler au leong d' l'Esquéaut. Essayez toudis d' faire cha quand vous êtes au leong d' l'Esquéaut au quai Noter-Dame et qu' vous voulez printe l' Peont d' fier. Bonjour el' briscadache !

In tout cas ch'est fin bieau et cha a 'té bin busié. Et tout cha pasque l' Ville elle a orchu des liards de l' Régieon walleonne pou rénover les voiries pasqu'on on aveot abattu l'incienne clinique Saint-Georches et l' maseon du couin. Par queonte, les bâtimints qu'on a construits à l' plache, l' ceu d'Ideta et les log'mints du quai Saint-Brice, mi je n' trouèfe pos cha bieau et j' n'ai d'ailleurs acore intindu perseonne qui m' diseot qu'i trouveot cha bieau. Que du contraire ! Quand les gins i-in parl'tent, ch'est pour dire que ch'est laid.

I suffit de s' mette au Pont-à-peont et d' raviser l' quai Saint-Brice. L' prumière partie s'qu'à l' rue Royale et l' début après, ch'est des maseons qui-ont été orconstruites après l' guerre, dins des matérieaux traditionnels régionaux, in briques et in pierre. Mais queu cang'mint après avé les bâtimints qu'on a construits à l' plache d' l'incienne clinique. Si ch'est cha l'architecture contimporaine, i-a pou s'infuir !

Si l' ville elle s'a imbellie avé l' nouvelle voirie, chaque jour elle s'inlaidit avé les nouvelles constructieons.

Arnitoile