13 septembre 2017 par Arnitoile

Nos édiles i s' foutent du commerce local et cha fait quarante à chinquante ans qu'i feont tout pou l' mette à bas. I-eont d'abord permis l' constructieon des Bastieons, du zoninque à Froyennes et l' ceu de l' chaussée d' Bruxelles. Comme i n' d'aveot pos core assez, i-eont permis leu n'extinsieon. Feaut vir tout quoi qu'on construit acore aujord'hui à Froyennes et aux Bastieons.

Et avé tous les travéaux qu'on a faits pindant eine paire d'ainnées au chintre ville, on a tué les boutiques ein peo puque. Et ch'est l' même avé tous les aménag'mints qu'on a faits autour de l' cathédrale dùsqu'on n' sait pus dùsqu'elle est l' plache pou les piéteons, pou les vélos ou pou les carettes. Ch'est dingereux d' pourméner dins ces rues tell'mint qu' les carettes i roul'tent vite. Feaut dire qu'i-a certaines rues l' soir, comme l' rue d' l'Hôpital Noter-Dame, que ch'est des vraies autoroutes pou les carettes. Feaut pos ête étonné qu'i n'a pus perseonne qui veut faire ses commissieons dins ces rues-là.

Malgré tout cha nos édiles i trouèf'tent qu'i-acore trop d' boutiques au chintre ville, alors i s'in prenn'tent aux marchés. Z'avez d'jà été eine séchu dùsque les marchés i seont éclatés aux quate coins de l' ville ? Bé on a acore l' ponpeon. I n'a qu'à Tournai qu'on veot cha. I vous feaut eine carette si vous voulez tous les faire de l' plache de Lille à l' plache Crombez in passant pa l' Grand-Plache.

Asteur nos édiles i z'eont acore eu eine idée lumineusse pou l' marché d' l'Imp'reur. L' marché d' l'Imp'reur ch'est l' ceu de l' Grand-Plache. Pourqueo qu'on l'appelle ainsin, je n' sais pos mais ch't'ainsin qu'on l' déleomme.

I-eont décidé d' warder l' parkinne d'ssus l' Grand-Plache et d' déménager les marchands 'squ'à l' plache des Acacias in déquindant pa l' rue des Chapeliers. Z'avez d'jà pourméné pa l' rue des Chapeliers, vous-éautes ? Pasque nos édiles nofé. L' rue des Chapeliers, ch't'ein vrai courint d'air. Ch'est bin l' raiseon pourqueo i n'a pos ein bistreot là d'installé alors qu'i-areot tout l' plache pou li mette eine terrasse.

Tins, les étals à l' rue des Chapeliers et à l' plache des Acacias, cha a duré foc eine paire de meos et puis après i z'eont tertous d'salté. Tell'mint qu'i-a du vint. Alors aujord'hui i n'a pus perseonne dins ces rues et l' marché d' l'Imp'reur i-a 'té diminué de l' mitan. I falleot acore cha in puque pour l' commerce du chintre ville. A m' meote que tous les jours nos édiles i deot'tent s'écrier débaltés : mort à l'Imp'reur !

Arnitoile