24 janvier 2018 par L’Infant d’ Tournai

Bonjour, savez, mes gins. J' vas ichi vous in raqueonter eine. Comme quoi aller printe l'apéreo dins ein bistreot du chintre-ville, ch'est alfeos beon... cha n' s'reot foque pou l'apéreo in li-même.

Mais ç' jour-là, ch'teot jusse avant les fiêtes, alors que l' patreon i m' serveot eine beon Picon, l'ov'là ein éch'fin d' no beonne ville qui rinte tout défoutu ! On areot tout dit ein qu'i-aveot perdu s' quinzaine.

Et alors Gégène – j' l'appelle ainsin pou n' pos dévoiler s'n idintité – quoisque ch'est qui t'arrife ? « Te n' sareos jamais ad'veiner ! I n'a qu'à mi qu' cha arrife des affaires ainsin.

T'taleur, j' sors de l'hôtel de ville et j' deveos m'in aller s'qu'à la gare. J' déquinds l' rue Saint-Martin et j' vas jusqu'à Saint-Brice. Là, j' prinds l' rue du Monnel et l' rue Royale. Arrivé là, j'intinds eine séquoi qui fait du potin à m' camionnette. Je m' dis : « cha z'y-est, j'ai perdu m' peot ». J' m'arrête et j' veos que m' peot i-éteot toudis là. Jusque là, j' d'aveos. Du peot hein ! J' fais l' tour et j' veos que l' porte-roue d'secours qu'i-est pa-d'zous, i s'aveot ouvert et i traineot par tierre. Seul'mint là j' veos que m' roue elle n'est pus là ! »

J' profite alors d' li d'minder si i preneot eine séquoi pasque mi j' beffieos pa-d'vant m' Picon et j' n'aime pos d' boire tout seu...

« Acoute » qui m'dit. Ben mi je n' faiseos qu' cha. « I m'a v'nu eine idée » qu'i rajoute ! Comme quoi, on n' direot pos, mais i n' d'a dins leu tiête hein ! « J'ai vite app'lé Armand pou li dire que j'aveos perdu m' roue et qu' si ein d' ses ouverriers i l' trouvreot in ville, bé ch'teot l'mienne. »

L' patreon i li aveot à peine servi eine crasse pinte qu'i-a ein clieint, assis su l' banquette et qu'i-aveot intindu tout l' babiellache de « Gégène », i dit d'ein air tout tranquile : « Si ch'est l' pétite roue d' vo camionnette bleue qu' vous cachez, j' l'ai vue t'taleur dins l' rue de l' Wallonie »

Hé bé croyez-me ou pos mes gins, je n' l'aveos jamais vu queurir aussi vite ! Et i-a ram'né l' roue dins l' café pou li finir s' paufe crasse pinte !

Et ch't'alors que l' clieint i-a rajouté : « Savez Mossieu l'Ech'fin, quand ç'qu'on veot l'état de l' rue Saint-Martin, vo roue elle ne pouveot pos ête bin leon ! »

J' deos dire que ceulle réflexieon elle a fait rire bin des gins dins l' bistreot. Infin, bin des gins, pétête, mais pos l'éch'fin !

Là-d'ssus, à l' feos qui vient, mes gins !

L'infant d' Tournai