7 mars 2018 par Catoupi

« Drôles de biètes », ch'est l' thème du carnaval qu'i va avoir à Tournai l' wékenne qui vient. In v'là ein thème qui va bin aller à eine paire de confréries : les mouques à miel, les flamands roses, les coccinelles (qu'on deot puteôt app'ler les biêtes à beon Dieu), les loups (même si i seont garous), les lapins perdus (qu'on d'vreot puteôt app'ler les lapins du lundi perdu), les chats-touilleux, les minnies (qu' ch'est bin seûr des soris), et même les diablotines, vu qu' ch'est des quéautes lapines, les diapes, vu qu' ch'est alfeos d'z'ours, les rats d'eau teuh (cha ch't'ein bieau jeu d' meots !), les Titis (même si cha n'a rien à vir avec Grominet), les sott' vaches et j'in oblie seûr'mint eine banse.

Tous ces confréries-là, i n' doif'tent po s'in faire pou leus costumes, i seont d'jà dins l' thème à l'avanche.

I-a d'z'éautes confréries qui s'reont dins l' thème par ein accessoire ou un maquillache. Par eximpe, on peut trouver facil'mint des nez d' pourchéau, des orelles de baudet, des pis d' vaque et toutes sortes d' bricoles, i feaut l' dire, assez raffinées.

Infin, i-a eine confrérie qui s'ra bin dins l' thème avec, vu qu'i feont eine pèque aux canards dins l' bac du Pichou saint-Piat, du saim'di après-deîner. Ch'est les P'tits Rambilles (ein neom bin tournaisien) qui feont cha. Ch'est autour de quinze heures, et ch'est gratuit pou l' z'infants. Après avoir attrapé ein canard avé leu canne à pèque, i z'orchoiftent eine bab'lute ou eine chuquarte. Et l' dernière récompinse, ch'est l' discours d'ein qui s' fait déleommer « Bourguémette ». Bourguémette du carnaval bin seûr. Même que cha a été l' prumier roi carnaval à ête élu in 2006. Ch'est l' comble : élire el' bourguémette roi du carnaval. Acore hureux qu' cha n'existe pos in politique, on s'reot propes !

Pour orvénir à ceulle pèque aux canards, ch'est ein des bieaux momints du carnaval, et surtout ch'est espécial'mint pou les infants. Adeon n'hésitez pos à v'nir vir cha, in espérant qu'i n' f'ra pos ein freod... d' canard !

Catoupi