9 mai 2018 par Charleot

Salut tertous, je n' sais pos pour vous mais mi j' sus mate... Inter les allergies à les fleurs et l' pollen, l' cang'mint d' heure que je n' m'in sus toudis pos r'mis, et l' caleur qui-arrife tout douch'mint, eh bé ch'est pos facile tous les jours !

Mais n'impêche, j' warde l' bénaisseté d' vife pasque queu plaisi que l' bieau temps soiche là (dins tous les cas, i fait bieau pindant qu' j'écris ceul artique), ch'est l'heure des prumiers barbecues... évidemmint, te n'arrifes pos à l'alleumer margré treos lites d'essince ! Quand te pinses, qu'au Portugal, eine cigarette mal éteinte i-a brulé treos chint hectares et ti te n'as pos l' tour d'alleumer ein mète carré !

Grâce au bieau temps, on seort avec les sorlets de marche et on s' pourmène in pinsant à rien. M' feimme elle dit toudis que ch'est ç' que j' fais d' mieux : pinser à rien ! Et pourtant si elle sareot, pindant m' pourménate, cha m'arrife de pinser à queulle espécialité j' vas chiffler in rintrant à l' maseon. Pasque i-a pos à dire, quand i fait quéaud, i fait seo ! Et quand l' solel i t' deonne rindez-vous, mi j' vas su l' grand-plache. I-a facile asteur de trouver eine cayère in terrasse vu qu' tertous seont d'allés à les bastieons ! Mais même cha, cha m'esquinte. Ein p'tit consel quançque t' vas in boire eine dins no ville : te deos toudis prévoir d' l'argint sur ti ! Pasque si t' deos aller à t' banque su l' grand-plache , au distrinuteur dusque te t' sers ti-même, t'as toudis ein zique ou eine feimme avé s'n'infant, qui fait l' manche et t'orclames des liards... Au début j' deonneos, j' te l' promets mais asteur ch'est fini ! Tous les liards que j' deonne ch'est tout's les pintes que je n' peux pus boire... Et quand te sais qu'avec l'argint orchu, i-in a dins ces gins i s'in veont ...l' boire, féaut pos s' foute du meonte... Adeon, v'là eine séquoi qui m' fatigue in puque !

M' feimme dit toudis que si j' ai l'air mate ch'est pasque j' beos tous les saints que j' conneos. Et que j' s'reos acor capape d'invinter ein saint pour mi in tuter eine in puque ! I-a pos à dire, m' feimme chérie, elle veot clair ! Ed'pus toudis, l'heomme cache après des prétesques pour faire l' fiète. Et mi j' n'in peux pos si Tournai m' deonne sitant d' prétesques... Tins rwette le 11 mai !!! Ch'est l' début des saintes-glaches (tins, v'là ein éaute saint !!)... On d'vreot ête ingélés et d'meurer à s' maseon mais malhureus'mint pou ... m' feimme, i-a l' fiète de l'accordéeon. Et comme ceulle ainnée, l' Cabaret Walleon i va ête de l' partie et cant'ra des cancheons (éné on est sur tous les freonts) , bé l' prétesque j' n'ai pos d'vu l'invinter puisque i-éteot d'jà tout trouvé ! Adeon...

Merci Tournai, Merci l'accordéeon et Merci l' Cabaret Walleon !

Charleot