30 mai 2018 par Charleot

Salut tertous, Mayday Mayday qu'i direot m' copain inglais !! Ou l' GPS d'ein étringer quançqu'i arrife à Tournai ! Pasqu'avé tous les travéaux qu'i-a là d'dins, bé faudreot ein dreône pou s'ortrouver...

Cha n' sert à rien d' lire les pannéeaux vu qu'i-est marqué pa d'sus « déviatieon » ! Ah cha, i-a pos à dire quançque t' roules dins Tournai, te dévies... T'es tell'mint dévié qu'i féaut faire attintieon de n' pos orsortir de Tournai et d'aller vers Courtrai ou Mouscron ! L' seul avintache, ch'est quançque t'es dévié vers Mouscron pasque t'as eine croque ! Pour cha, i véaut mieux aller à l' clinique à Mouscron qu'au Chwapi...

Dins l' feond, l' seule route qui-est accessipe à Tournai bé ch'est justemint l' Chwapi et ch'est dammache... Mi j' pinse qu'i féaudreot l' mucher ç't'indreot ! El' dernière feos, j'ai eine amisse, elle vient pou s' pétite de deux ans, on li dit qu'elle a jusse ein p'tit rien à s' gorche... In vrai elle aveot eine pneumonie. Pourtant quançque l' pétite respireot, même au sous-sol, rayeon blinchiss'rie, on intindeot ses breonches raquer ! Elle éteot aussi jus d' haleine que l' Maggie de Block qui mont'reot d'eine traite les deux-chint chinquante-sièt marches d' no bieffreo ! In fait, quançque t' rintes dins l' Chwapi, te sais au feond d' ti-même ç' que t'as, te veux jusse eine ordeonnanche pasque t' méd'cin, i n'ouèfes pos de l' nuit...

I-a des queop que ch't'à s'déminder si i n' vaudreot pos mieux rester à s'maseon. I-a eine sémaine, j' vas pasque j'ai mau à m' dint,... J'ai sorti d' là vec eine cystite comme diagnostic... J' li ai dit au docteur : « J pinse qu'on dévie, là ?? » I m'a dit : « Sifait, ch'est normal, t'es-t-à Tournai... »

Mais serreons l' sujet du Chwapi et orvéneons su l' circulatieon tournisienne... Comme te l' sais pétête pos, mi j' sus t'ein optimisse de nature... Et j' trouèfe cha bin d'ête toudis à l'arrêt dins no ville in carrette ! Si t'ortires l' temps que t' perds, l' pollutieon qu' te fais avé l' moteur dins l' vide et l' bruit des klaxeons qui bériell'tent à goguéo, éh bé, ch'est-ti pos formidape de vir nos molumints, d' les or'contimpler...

Cha fait qu'au quai Sakharrrof ( je n'sais jamais commint cha s'écrit) quançque j' sus t'à l'arrêt, bé j'orwette el' peont des treos, et j'in profite savez ! Pasqu'i n' s'ra pus là dins ein an, si cha cait ! Au boul'vard tout près du Rond-point d' l'Europe, quand j'sus t' à l'arrêt, j' ravise no bieau gardin d' la Reine dusque les infants jeuttent dins l' bac à sable inter les abres et les séringues qui-eont d'jà servi...

Mais queu plaisi d' vir les infants d' faire leu-n'apprintissache d' la vie ! Quand j' pinse qu'à Charleroi, Liège et Mons, i veont créer des salles de shoot dusque t' peux t' dreoguer à t'n'aisse, alors qu'à Tournai, ville avant-gardisse, on a tout simplemint l' gardin d' la reine... L' pus pire dins tout cha, ch'est qu' margré tous les déviatieons et les déviances que t'as là, mi, je n' sus pos prêt d' dévier d' Tournai (d' tout' faceon, si j'areos essayé, j' m'areos seur'mint pierdu su l' quémin !)

Charleot