29 août 2018 par Catoire

Ch'est l'été. I fait beon. Alors, de l' journée ou su l' bord du soir, quoi ç' qu'on fait ? Si on vit dins ein appartemint, on s'installe d'su s' terrasse et on ravise quoi ç' qui s' passe d'su les balcons d'in face. Ainsin, l'eaute soir, j'ai vu eine gramère « joggeuse » avec ein écorchwé rosse et des bigoudis ; cha n'est pos courant, savez. Ses bras bin collés au corps, à p'tites foulées, elle a fait eine quinzaine de queops l'aller et l'ortour su s' terrasse. L' quate chint mètes balcon ch't'à inscrire comme nouvelle épreufe des jeux olympiques, ch'est seur !

A l'étache du d'ssus, i a l' fantôme de l' résidince. On n'a jamais vu l'occupant ou les occupants d' ceul log'mint. I-a jusse eine leumière dins l' living tout au leong de l' nuite mais on n' veot jamais personne au balcon ni même à l' ferniète. Quand j' dis personne, j' veux dire personne in intier. Pasqu'ein jour d'su l' queop d' midi, l' porte-vitrée de l' champe éteot ouverte et j'ai vu eine mitan d' gampe de pyjama avec eine pantoufe intière au bout. Et ceulle mitan d' gampe éteot assis pa-d'vant ein bureau.

Infin, au rez d' chaussée, i a eine vieille harpielle vraimint bizarre. Elle freume tous ses volets d'su l' queop d'onze heures au matin. Ch'n'est seur'mint pos pou s' mucher du solel puisque s'n' appartemint i-est in plein nord ! Elle est maniaque comme quate. Adeon quand ses nouvieaux visins i z'eont fait des travaux, elle est d'allée berteonner pasque cha f'seot de l' poussière jusqu'à d'su s' terrasse. A m'n'idée qu' cha a tourné au vénaique pasqu'asteur on n' les veot jamais in même temps déhors. Quand ses visins i seont là, elle rinte et quand i seont rintrés elle sort. Cha m' fait pinser aux baromètes qu'on acateot dins l' temps. Avé l' madame à l'ombrelle pou l' bieau temps et l' mossieu au parapluie dins l' cas cantraire. A part qu'ichi dins les deux cas, l' temps i est toudis bin carmoussé ! Et après cha, on s'étonn'ra acor qu'on batielle partout sur tierre !

Catoire