5 septembre 2018 par L' Grante vadroule

Mais qu'i pue, qu'i pue, qu'i pue ichi. J' rattindeos à l'arrêt d' l'autobus. Commint qu' ch'est possipe d' puir ainsin au mitan de m' chité. J'ai c'mminché pa rwettier si m' boîte d' Maroilles i-éteot bin serrée dins m' sa. Puis, du couan d' l'ouël, j'ai ravisé mes visins. Is éteottent fin propes su eusses. Mais beon, les pieds seont dins des queauchettes et les queauchettes dins des sorlets. Si t' n'orlaves pos tes pieds, les sintimints is ormeonttent et cha arrive à t' nez.

Comme l' ceu des eautes i friseot avec, j' m'ai dit qu' cha v'neot d'ailleurs. Et on m'a espliqué qu' ch'éteot les cinsiers qu'i-aveottent éparte du feumier dins leus camps à eine paire de kilomètes de l' ville. J'ai toudis d'meuré à l' campane. Je n' sus pos acore décati, mais je m' raminvre que, dins l' temps, t'aveos l' naque des flates de vaques obin du purieau qui v'neot des commodités. Asteur, ch' n'est pos les mêmes sintimints. Les cinsiers i-eont dit in prumier qu' les Tournisiens is aveottent de l' sanche d'acore avoir de l' campane tout près alintour. Puis, i-eont espliqué qu' ch'éteot pou no bien vu qu'on ara b'soin d' blé pou l' pain, d' pétraches pou l' chuque, d' penn'tières pou nos frites et tout à l'avenant. Ch'est vrai mais, à m' meote qu'i n' d'a qui-épartent du lisier d' pourcheau qui vient d' chez les Flaminds. Et cha, cha pue si t' ne l' fouis pos tout d' suite. Ch'est acore pus pire si i-a pos d' pluèfe, qu'i fait queaud, que l' tierre i-est sèque et que l' vint i va du côté de l' ville. Ch'est dins l'air du temps et nu shérif i pourreot l'impêcher. On n'est pos au Sahara et on sait bin qu'in Belgique, i n' feaut jamais rattinte lommint pou vir caire d' l'ieau. Adeon, patieinche. Cha passera. Pétête même que ch'est d'jà passé quant te liras ç' billet.

Eine feos qui vient, j' vas vous parler des gins de l' ville qui veont imménager au villache. I d'a des belles à dire avec.

L' Grante vadroule

Lexique : sorlet : soulier / sintimint : odeur / cinsier : fermier / éparte : répandre / camp : champ / décati : en mauvaise santé / s' raminvrer : se souvenir / naque : odeur / flate : bouse / purieau : purin / sanche : chance / pétrache : betterave / pluèfe : pluie / nu : aucun / caire : tomber /