23 janvier 2019 par Pichoulit

Je n' sais pos si t'es comme mi mais i-a alfeos d'z'affaires que j' n'arrife pos à comprinte.

Ainsin, v'là ichi eine paire d'eximpes.

Dins les cliniques, l'z'hôpitaux, les homes, l'z'infirmières i queurtent seots pou arriver à faire leu n'ouvrache. I n'eont d'jà pos l' temps d' parler avec les gins et v'là que d'pus eine paire d'ainnées, i doiv'tent passer leu temps à incoder tout l' bazar . Même qu'i d'vreont béteôt ête pu forts in informatique qu'in soins à deonner à les gins. Vas t'in comprinte...

On n'arrête pos d 'tirer l' signal d'alarme pou nous dire que l' planète elle se réquauffe, que l'z'ours su l' banquisse i n'arriv'tent pus à trouver assez d' glache pou s' déplacher, qu'i n'a pus d' saiseon et tout cha, mais quand on veut décider eine séquoi pou diminuer l' pollutieon, on n'arrife pos à s' mette d'accord. Mi, je n' sus pos tranquille pou l'av'nir d' nos infants et d' nos p'tits infants mais on continue à faire comme si i n'aveot pos d' danger. Vas t'in comprinte...

On a mis à l' tiête d'ein des pus grands pays du meonte ein gaillard qu'on n'est pos vraimint seur qui a tous les frites dins l' même paquet et on continue d'inviter comme ein VIP ç' grand berleo qu'in puque i-est vraimint mal él'vé. Et on propache tous les biestries qu'i raqueonte su Twitter. I n' respecte ni les feimmes, ni les gins dins l' misère ; dins s' pays, l'z'incendies ravach'tent des régieons tout intières, des jeones i s' feont tuer pa d'z'armes à feu... mais i-a tout ein peuple qui-a voté pour li. Va t'in comprinte...

Dins no belle chité, on a d'mindé à les gins quoi ç'qu'i z'aim'reotent qu'on fait pou agrandir l' peont des treos. Les gins i-eont deonné leu n'avisse et on va faire tout l' cantraire. Vas t'in comprinte...

Dins eine grante société de l' province de Lièche, on s'a rindu queompte que les gins qui dirigeotent l' bazar i s'in fouteotent plein les poches avec les liards de l' société. On l'z'a condamnés. L' société elle va canger d' neom mais les ceusses qui eont été orconnus coupapes, bé i veont rester à leu plache. Vas t'in comprinte...

I-a ein grand parc animalier qui-a décidé d' mette des couvertures à l'intour d' ses arpes exotiques et d' leu mette du chauffache élestrique pou qu' les arpes i pass'tent leu n'hiver au queaud. Pindant c' temps-là, i-a eine masse de gins qui seont à l' rue sans couverture (ni in laine, ni sociale d'ailleurs)...Vas t'in comprinte....

Si t'oblies d' payer les quinze euros qu' City Parking, i t' fout su t' par-brisse à tout bout d' champ, t'aras ein rappel et eine aminte in puque. Pindant ç' temps-là..., i-est beon j'arrête là, cha m' déprime. Décidémint, j'arrive pos à comprinte...

Pichoulit