15 mai 2019 par Pichoulit

Ch'est orparti pou ein tour. On va cor voter....

Mais ç' queop-chi t'aras treos bulletins : ein pou l'Europe, ein pou l' Fédéral, ein pou l' Région. Si on ajoute les deux bulletins du meos d'octope pou l' ville et pou l' province (inter parinthèsses qu'on s' déminte bin à queo qu'elle sert acore l' province sineon à t' taxer ein p'tit queop d' puque et r'caser les politiques qu'on n'a pos su mette ailleurs), cha fait cheonq feos voter in six meos, ajoute l' votache-farce pou l' peont des treos, t'aras bétôt pus d' bulletins qu' sur ein an à l'école.

In parlant d'école, adeon, l'26 du meos d' mai, t' vas ortourner à l'école, t' mette in rang avant d' rintrer dins l' classe pou faire t' devoir... électoral. A espérer qu'i n' pleut pos d' treop, sineon i-a bin d'z'indreots dusque te va ête arringé avant d' voter ; cha n' te cang'ra pos beauqueop, te vas quand même ête arringé après l' votache même si i n' pleut pos.

Après cha, t' diminche i-est oute. Pos questieon d'aller au gardin, te t'as mis su t' trinte et ein, adeon te n' vas pos t' canger, pos questieon d'aller à la mer, te s'ras à peine là qu'i t' faudra orvénir vu les imbouteillaches qu'i risque d'avoir.

Eh, bé on a ein beon plan pour bin finir l' journée.

L' Cabaret i deonne ein Cabaret philanthropique au profit d ' « L'Ile en soi », que ch'est eine ASBL installée à côté du CHWAPI et qui proposse d'z'activités et des rincontres pou les ceusses qui-eont eu ein cancer et qui-eont b'soin d' s'orsourcer. I-a là des conférinces ou bin d'z'activités dusqu'i peuv'tent là faire l'inglais, des massaches, de l' nutritieon, du yoga, s' faire coiffer et acore eine masse d'eautes affaires qu'i d'a même que je n' sais quoi ç' que ch'est, avé des neoms savants comme Pilate ou réflexologie plantaire (que je n' sais pos commint qu'on dit cha in patois) et bin d'eautes acore .

Adeon, l' Cabaret i va canter pou ceulle ASBL. Tous les liards récoltés : l' prix d'intrée, les bénéfices du bar ch'est pou « L'Ile in soi » et i n' devreont même pos payer l' salle pasque l' maseon d' la Laïcité elle leur offère leu local pou rien.

Seûr que les cancheonniers i n' pourreont pos acore canter su l's' électieons du matin, i peuv'tent alfeos orbondir très vite su l'actualité mais là, ch'est pos possipe d'écrire su des résulatts qu'on n'ara pos acore. N'impêche ch'est pos les sujets qui manqu'reont aux cancheonniers pou vous faire rire d'l'actualité.

Adeon, pou ein pinte de beon sang dins l' langache d' chez nous eautes mais aussi pou sout'nir les gins qui s'occup'tent d' « L'ile en soi », on vous attind l' diminche 26 mai à 16 heures à la Maseon d' la Laïcité, au luméro 13 de l' rue des Clairisses.

Et comme ch'est ein diminche, pos questieon d' payer l' parkinne, les gins d' City Parking i seont au r'peos...

On peut réserver s' plache par mail : Cette adresse email est protégée contre les robots des spammeurs, vous devez activer Javascript pour la voir.

OU au 0486 91 11 95, ch'est 8 euros. On peut aussi printe s' plache l' jour-même mais là ch'est 10 euros.

On vous attind tertous !

Pichoulit