22 mai 2019 par Anar

Dins nos villaches on intind toudis tout' seortes d' proverpes que nous eautes on appelle cha des queontes de vieux.

Ch'est des seortes d' consels, par eximpe : jamais s'mer à l' lune meontante mais toudis à l' lune déquindante, des consels qui seont souvint l' résultat d' l'éspérieince des gins qui éteot'tent là avant nous eautes.

J' deos bin avouer qu'i-a acor bramint d' gins qui creot'tent à cha dur comme du fier.

I-a ein d' ces proverpes qui dit ''si t'as des liards dins t' main quanç'que t' veos l' prumière arondielle de l'ainnée t'aras des liards toute l'ainnée''.

Comme cha n' coûte rien d'approuver, j'ai mis ein euro dins m' main et j' sus d'allé vir à eine cinse dù qu'i-a toudis ein greos tas d' feumier et là, tout d' suite j'in ai vu eine !

J'éteos fell'mint contint et seûr de m' queop que j'ai té tout d' suite faire ein lotto.

L' résultat n' s'a pos fait attinte. Dins les jours qui-eont suivi, j'ai orchu l'élestrique à payer et puis les iéaux et l' tasque auteo, ch'éteot quand même mal parti.

L' pire, ch'est qu'après, j'ai eu eine aminte pasque j' rouleos treop vite à du chinquante-treos kilomètes à l'heure , j' n'in sus pos cor ormis.

Alors, mi j' pinse qu'avec les queontes de vieux i-a à boire et à minger.

Comme j' m'in vas in boire eine, j' vas quand même acor suife ein consel ''i n' feaut jamais s'in aller sur eine gampe'' et cha ch'est ein beon consel.

Allez... à la prochaine !!!

Anar

PS : au lotto j'ai eu deux beons luméros.