17 juillet 2019 par Catoupi

 
Ch'est eine belle fiête qu'i-a eu ichi à Bruxelles pou l' départ du Tour de France à véleo. Et no pus grand champieon belche, dins tous les sports qu'on peut imaginer, i-a bin été mis in vedette : Eddy Merckx !

Quand j'éteos p'tit, et qu' j'ai su rouler à véleo, j' faiseos des sprints su l' trottoir in disant « j' roule comme Eddy Mertsss ! ». Ahais, à l'époque, je n' saveos pos cor lire et écrire, adeon ch'éteot pos facile d' dire et d'orténir el' neom du champieon. J'aveos même fait ein cahier dusque j' colleos les artiques d' journal quand ç' qu'Eddy i-aveot gagné eine course.

Malhureus'mint, j'ai v'nu au meonte eine paire d'ainnées trop tard, et mes prumiers souv'nirs du Tour de France, ch'est quand Eddy i-a c'minché à n' pus gangner... Ah ! ç' midjou d' Tour de France in septante-cheonq, avé l' défaillance vers Pra-Loup, et Thévenet qui prind l' mailleot...

Mais orvéneons à les beons momints d'Eddy : et, comme i l' dit li-même, l' meilleu momint, ch'est l' vingt-et-ein juliet soixant-noué, s' prumière victoire au Tour de France.

M' papa i m'a toudis raqueonté que ç' jour-là, i-a fiêté l' victoire d'Eddy tout l' jour au bistreot (vu qu' ch'est li qui serveot les pintes à l' Guinguette) et qu'après i-a orwettié l' prumier pas d' Armstrong su la Lune (qu'on dit aussi « l' Belle »). Mais i s'a indormi pa-d'vant l' télé in plein mitan de l' nuite et i n'a pos vu l' dénou'mint... qu' tertous i conneot asteur.

Eddy, ch'est ein sportif comme i n' d'a pos dix su l' tierre. On parle d' Pelé in fotbal, d' Federer in tennis, d' Mohamed Ali in bosque (ch'est ein sport, cha ?), foque des sportifs d'esseptieon. Mais dins l'esseptieon, à m' meote qu' Eddy ch'est l' pus grand champieon d' tertous.

Et avec cha, i-a toudis resté d'eine grande humilité. I-éteot tout géné d'ête mis à l'honneur pou les chinquante ans de s' prumière victoire. Et bin seûr, comme ch'éteot à Bruxelles, i-éteot acor pus bénaisse. Et les gins i li eont bin fait d' l'honneur.

Dins ein an, on fiêt'ra l' deuxième victoire d'Eddy, et ainsin pindant eine paire d'ainnées,vu qu'i d'a gangné cheonq.

Et comme cha comminche comme s' neom d' famille, on n'a foque ein meot à dire à Mossieu Eddy : MERCKCXI ! oups, MERCI !

Catoupi