21 août 2019 par Pichoulit

 
V’là qu’asteur no gouvernemint pourreot printe l’ neom d’ coqu’liqueot. Ch’est l’occasieon ichi d’ vous parler des fleurs.

Pasque les fleurs on in trouèfe tout partout, dins les lifes (l’ lotus bleu), les films (au neom d’ la rôsse), dins les fiêtes (l’ muguet du prumier mai), dins l’ langache amoureux (effeuller l’ marguerite), dins les cancheons (l’ poinçonneu des lilas) et j’in passe.

L’idée d’ printe eine fleur pou parler d’ politique elle n’est pos nouvelle : les socialisses on l’z’appelllent d’jà l’ parti à la rose et à Bruxelles, l’ fiête de l’ communauté ch’est l’ fiête d’ l’iris.

Au Portugal, i z’eont fait l’ révolutieon des œillets. Et ichi, on a donné l’ neom d’olivier ou bin d’ violette à eine eaute forme d’ coalitieon.

Les reos d’ France i z’aveotent l’ fleur de lys comme imblème et su l’ drapéau du Canada, te peux vir ein érable ou acore ein cèdre su l’ ceu du Liban, (ch’est quand même pus bieau que l’ lion flamind…)

Même les sportifs i-eont pris l’ neom d’eine fleur ou d’eine légueume pou s’idintifier : ainsin au rugby, l’ trèfle, ch’est l’ symbole d’ l’équipe d’Irlande, l’ porieon l’ ceu du Pays d’ Galles et l’ cardeon, l’ ceu d’ l’Ecosse.

Tins in parlant d’ cardeon, ch’est pos toudis tout rosse d’ parler des fleurs in politique.

Dins les affaires d’ Publifin par eximpe, on a bin du mau à découvrir l’ peot aux rôsses. Et pourtant i n’a pos d’ rôsse sins épeines mais dins ces affaires, cha n’ sint pos vraimint la rôsse… Et ch’est sans doute aussi ein arpe qui muche la forêt… qui sait ???

Côté cardeon, i n’a pos treop d’ queo s’inquiéter pou les ceusses qui n’ veont pus avoir d’ mandat, avé l’ chèque qu’i veont orchevoir, i veont pouvoir casser la graine à leu n’aisse ein beon bout d’ temps. Inaugurer des chrysanthèmes à longueur d’ainnée, cha peut t’asseurer eine ortraite dorée, ch’est eine faceon comme eine eaute d’ faire son blé.

Je m’ déminte quoi c’ qui z’in pinsent tous les ceusses qui pertent leu n’ouvrache et qui

doiv’tent aller à l’ tique et s’accrocher tous les jours au cocotier pou nouer les deux bouts et après cha, on s’éteonne qu’i d’a qui feont du foin… et qui eont l’ moral à fleur de pieau.

Eine feos l’ législature finie, ch’est ein cycle qui s’achèfe, eine sorte de cyclamen, quoi. On peut dire alors que l’ gouvernemint i-a atteint l’ fleur de l’âche et i feaut bin passer l’ main même si i d’a qui veont printe racheine pasqu’i s’ prenn’tent pou l’ fine fleur de l’ politique (et ainsin avoir leu s’indemnités eine feos partis).

Dins les négociatieons d’après , ch’est pos tout rôsse et tout violette, i feaut faire attintieon de n’ pos pousser treop vite grand-mère dins les ortilles, ni à s’indormir su ses lauriers au risque de s‘ortrouver su l’ palle, cha s’reot l’ bouquet. Tertous i voudreot que l’ partenaire i li fait eine fleur , i content fleurette l’ein à l’eaute et eine feos l’c oalitieon mis in plache, i s’ lanch’tent des fleurs même si alfeos, l’ peot i suit et qu’après eine broulle inter eusses, i d’a ein qui invoie l’eaute su les rôsses.

I n’ d’a pos bramint pourtant qui veont ainsin aux négociatieons l’ fleur au fusil, tertous i velle au grain et i fait attintieon de n’ pos s’ laicher s’couer comme ein preonier ou laicher passer les décisieons futures comme eine fleur in étant treop fleur bleue (ou fleur rouche, fleur vert, fleur oranche….i n’ feaut pos faire d’ jaloux.)

Beon, j’ vous laiche, j’ d’ai dit assez . Après tout cha, j’ m’in vas su l’ camp arroser mes fleurs sineon elles veont filer du mauvais coteon. 

Pichoulit