11 septembre 2019 par Pichoulit

I l'eont fait ! I-eont osu l' faire ! Cha y-est, no Pont des Treos, i-a passé à l' trappe...

Comme tertous mi j'ai l' rache, j'ai du mau à m'ormette.

Comme tertous, j'ai été au chevet du peont moribeond pou vife ses dernières heures, jour après jour, ein p'tit queop comme si j'areos voulu orculer l'échéance.

J'ai vu ainsin tout l' ville défiler avec eine masse de nostalgie, ch'est bin l' prouèfe qu' no ville, on y est attachés, on l'aime bin, on y tient.

Des infants qu'on a voulu leu donner des imaches à orténir, des vieux , l' larme à l'oeul, des familles comme in pélérinache, l' tout Tournai su les quais ein soir, deux soirs, treos soirs d'été pou assister au massacre, au carnache.

Comme tertous, j'ai pos compris commint on a pu l'esquinter sans printe garte à préserver ses pierres.

Comme tertous, j'ai pos compris qu' mes gins du patrimoine, i n'eont pos daigné v'nir assister à ceul intier'mint d' prumière classe qu'on s'in areot bin passé in essayant d'avoir acore ein minimum d' respect pou ç' témoin d' no passé.

Comme tertous, j'ai li tout et n'importe quoi, j'ai li les plans les pus farfelus pou l'orconstruire, des déclaratieons qu'on s'in areot bin passé.

Et puis j'ai vu mes gins du SPW printe possessieon d' no patrimoine à queop d' butoir.

Comme tertous, j'ai vu commint no Peont i-aveot résisté sans laicher faire.

Comme tertous, j'ai eu l' pétite consolatieon d' vir que cha n'a pos été tout seu comme si cha s'reot eine réponse in désespoir de causse à ein destin qu'on n'aveot pos queusi.

Asteur, l' mal i-est fait, i faudra vife avec in espérant qu' nos édiles i veont ête attintifs à s'n'orconstructieon comme on l'a promis et qu'on n' va pos vir pindant d'z'ainnées les deux tours comme deux orphélines su les bords d'l'Esqueaut.

I n' reste pus à espérer qu' l'SPW i s'ra pus efficace que su nos routes et autoroutes.

On n' peut pus foque espérer qu'on n' f'ra pos pire acore in laichant l' peont des Treos dins l' même état que l' Meont d'Piété et l' grosse Tour... I reste à espérer...

Pasque comme i l'écriveot Charles Maillet dins les ainnées 3O « Mi j' braieros bin si ein jour on m' direot, i n'a pus d' Peont des Treos » Qui ch'est qui-areot cru que ç' jour-là... on y est.

Pichoulit