18 septembre 2019 par Pichoulit

Eine feos que t' prinds d'l'âche, t' comminches p'tit z'à p'tit à avoir du mau ein p'tit queop tout partout. Du queop l' docteur i m'a inveyé faire eine IRM.

Je m' déminte bin quoi c' que j'aveos à vir avé l' récauff'mint climatique pou m'inveyer ainsin à l'Institut Royal Météorologique mais m' feimme qu'elle est pus maline que mi pou c' qui est des docteurs elle m'a dit qu' ch'éteot eine Imagerie par Résonance Magnétique. M'ov'là bin avanché pasque à part l' meot imag'rie, les deux eautes meots cha n' me dit rien.

Adeon m'ov'là parti au CHWAPI. L' pus dur quand te vas là ch'est pos les examins, ch'est d'ortrouver t' route. D'abord pou avoir eine plache à parquer pasque l' parkine souterrain i-est alfeos complet du queop te deos carpinter dins l' coin in n'obliant pos t' disque sineon City Parking i t' va coûter pus tcher que t'n'examin médical.

Après, eine feos dins l' CHWAPI, i t'feaut ortrouver t' route, et t' GPS i n' te sert à rien là d'dins.

Eine feos qu' t'es-t-inscrit, tout i s' déroule sans qu' te t'in rinds queompte.

On t'esplique qu'on va t' mette dins eine espèce de fusée, les pieds pa d'vant qu'on direot tout qu'on va t'inveyer faire ein voyache interplanétaire et comme les infirmiers ch'est des p'tits heommes verts, du queop te t' creos parti pou ein voyache sur Mars.

I feaut dire que ces p'tits heommes verts i seont bin aimapes et qu'i feont tout pou t' détinte. Si tous les Martiens i seont ainsin, mi j' veux bin aller su Mars vu qu'ichi sur tierre on n' s'y ortrouève pus d' treop.

Te t' creos dins l' pieau d'ein cosmonaute et Dirk Frimout i d'vient t' cousin l' temps d' l'examin. On t' met Classic 21 dins tes orelles et t'ov'là parti pour eine vingtaine de minutes. Vingt minutes à rien faire, cha fait alfeos du bin.

Bin seur, on t'a dit qu' cha va faire du bruit mais ichi à Tournai, pou c' qui est du bruit, on est vacciné avec tous les travaux et les albrans qui-eont démoli no bieau Peont des Treos. Mes gins i-eont béteot fait pus d' bruit qu' les avieons à Zaventem. Dins l' feond on d'vreot leu d'minder des indemnités pou déring'mint de l' populatieon, cha n' nous rindra pos l' Peont mais cha f'ra toudis plaisi d' taxer ces démolisseus.

Mais orvéneons au CHWAPI. Ouais, cha fait du bruit mais on prind soin d' ti, t'as même eine pétite poire pou app'ler si jamais te t' sins pos bin. On t'esplique bin tout, on t'assiste à t'orlever, t'es béteot aussi bin r'chu qu'au restaurant.

Mais, quand t'es au Cabaret, te n' peux pos passer inaperchu, même avec eine rope d'opéré, in slip et à pieds d' quéauche, t'es orpéré. Je m' déminte pourquoi on a fait les frais d'ein nouvieau costume : on n'a pos b'soin d' cha pou ête orconnu. Mais l' désavintache ch'est qu' te deos t' ténir à carreau. Pos questieon d' faire des m'noules et d'ête ein p'tit queop doudouche, t'as eine réputatieon à t'nir, adeon t'es obligé d' faire simblant qu' cha n' te fait rien même si comme tertous t'es ein p'tit queop stressé...

N'impêche, mi j' profite de ç' pétit billet d'humeur pou dire tout l' respect et tout l'admiratieon qu' j'ai pou les méd'cins, les infirmiers et les infirmières.

Ces gins i seont vraimint à ormercier car i z'adouciss'tent la vie au moumint où elle est ein p'tit queop pus difficile.

On dit des malates que ch'est nous les patients, mais les vrais patients ch'est bin eusses pasque tertous i sait qu'ein malate in général cha n'est pos facile même si i n'est pos treop malate (ch'est ç' qu'elle dit m' feimme in parlant d' mi) et qu'i feaut alfeos bin de l' patieinche avec nous eautes, les malates.

Pichoulit