16 octobre 2019 par L' Infant d' Tournai

Bonjour, savez, mes gins !

Je n'sais pos si vous êtes comme mi mais si i-a eine séquoi qui m'énerfe d'pus in puque, ch'est bin les banques.

Dùsqu'i-est l'temps qu' t'alleos au guichet, que t' parleos de l' plouèfe et du bieau temps avé l' guich'tier, qu' te donneos tes liards ou bin t'orpreneos tes estraits et te li donneos tes vir'mints. Tout cha i s' feseot naturell'mint et tertous i-éteot contint.

Après cha, on a vu arriver les distributeurs et les cartes d'banques. On alleot d'jà moins au guichet. Quand ç'qu'on aveot b'soin d' liards, on alleot les querre directemint à l' machine. Et les vir'mints papier i z'eont été rimplachés par les ceusses électroniques, que te deos bin intindu faire ti-même.

Après cha, p'tit z-à-p'tit, les guichets i-eont serré boutique et on s'ortrouèfe bin souvint pa-d'vant des bureaux serrés. Si t' veux vir ein impoyé, te deos printe rindez-vous pasque l' banque elle n'ouvère que d' timps in temps.

Cha fait qu'asteur, te deos tout faire ti-même, qu' cha soiche à t' maseon – in payant internet bin seûr – ou bin su l'apparel à l' banque. Mais ç' qui m' fout in rache, ch'est qu' les frais que l' banque elle te fait payer, i seont d' pus in pus tchiers ! Ch'est tout n'même eine binte d'agoneux ! Au moins qu'i z'in foutent, au pus qu'on paie ! Et comme ch'est les clieints qui feont l'ouvrache, i z'eont foutu à l'huche bramint d' gins qui z'ouvreottent dins les bureaux ou au guichet.

Et je n' vous parle même pos d' l'éparne qui n' rapporte pus rien ! Et si on continue ainsin, i faudra payer pou que l' banque elle warde nos sous.

Je n' sais pos dùsqu'on s'in va mais i-a eine séquoi qui m' fait acor pus peur : ch'est qu'i veul'tent orsaquer de l' circulatieon les billets d' banque ! Ç' jour-là, on s'ra tertous l' biec dins l'ieau car on n' sara pus faire à s' meote avé ses liards ! L' banque elle va tout gérer et tout contreôler !

N' jimoulez pos que j' sus conte l' progrès, leon d' là. Mais avé tous ces cang'mints, j'ai puteôt l'impressieon qu'on orcule puteôt qu'avancher ! Et surtout qu'on va s' faire berner !

Infin, ch' n'est que m'n avisse... et tant qu' j'ai ein'paire de pièches dins mes tasses, j' m'in vas in boire eine !

Allez, à l' feos qui vient mes gins !

L'Infant d'Tournai