20 novembre 2019 par Catoupi

Bé à m' meote que ch'est dév'nu d' pus in pus rare... Et ch'est bin malhureux.

Dins l' temps, t'inscriveos t' garcheon dins ein clup et i resteot là pindant au moins dix ans. I-in a même qui faiseottent tout leu carrière in arrivant dins l'équipe prumière ed' leu villache ou bin d' leu ville.

Asteur, i n' pinstent pus qu'à aller jeuer à l'étringer. Ein gamin un p'tit queop prometteur, i s' veot tout d'suite au Real, à l'Inter ou à Manchester.

Feaut dire qu'on leu meonte vite l' tiête, à les jeones. Cha comminche d'jà in diablotins, i-a des visionneus qui vienn'tent des équipes d' divisieon ein, et i propos'tent à les p'tits bouts d'sièt ans d'aller faire ein test, pou vir si i pourreot'tent jeuer dins eine "grante" équipe.

Pus tard, on leu fait faire les mêmes déplach'mints qu' l'équipe prumière. Ch't'ainsin qu' les minimes ed' Mouscreon ou d' Meons i s' taptent des chintaines de kilomètes tous les s'maines, pour aller jeuer à Lièche ou dins l' Limbourg.

Et dès qu'i-a eine équipe hollandaisse, inglaisse ou all'mante qui-invoie ein "scout" (ein visionneu si vous préférez), nos jeones i seont partis. Et malhureus'mint, i d'a bramint qui s' cass'tent l' figure, qui n' jeut'tent pos ou qui s' bless'tent de l' rache qu'on leus z-in fait vir.

Et alfeos je m' demante pourquoi qu'un beon jeone i n'est pos contint avé l' salaire qu'on li donne in divisieon ein, même in Belgique. I-in a qui préfèr'tent gagner deux feos puque sans jeuer... Mauvais carcul, à m' meote : si te n' jeues pos, feaut pos espérer ortrouver eine plache dins eine éaute équipe, ni arriver in équipe nationale.

A côté d' cha, j' sus fin bénaisse d'avoir li, i n'a pos lommint, qu'ein jeone sportif tournaisien i préféreot rester à Tournai puteôt qu' d'aller jeuer dins eine grante équipe. Là, j' m'ai dit : "Ch'est bin, cha, garcheon !"

J' deos vous préciser, qu' ch'est pos in fotbal que cha s' passe, mais in tennis de tape (autermint dit, in pinque-ponque). Feaut dire qu'i-a d'z'équipes dins l' régieon dusque on intoure bin nos jeones, on les fait progresser, mais surtout, on les fait jeuer, et même in équipe prumière ! Bin seûr, i n' f'ra pétête pos fortune avé l' sport, mais au moins, ç' garcheon-là, i sait ç' qu'i doit à ses dirigeants et à ses intraîneus. I sait ç' que ch'est, l'esprit d' clup !

Et si ein jour, i-intraîne des jeones, i sara leu faire comprinte avec.

Catoupi