23 octobre 2019 par L' Grante vadroule

On est tout près du deusse d' novimpe et on a l' raminvrance de bramint d' morts, surtout des ceusses qu'on orgrette.

Cha m' fait pinser que comme tertous on a d'jà été à d's intierremints. Et comme tertous, on s'a ortrouvé imbêté au moumint d' présinter ses condoléances.

In prumier, i feaut savoir pou qui qu' ch'est qu' t'es là. Si te viens pou l' mort, te sais qu'i n' te veot pos et qu'i n'a pus rien à r'dire. Adeon, t'as jusse eine pinsée pou li. Si te viens pou l' famile ou les amisses, te veux vraimint moutrer qu' t'es là.

À l'offrante, te n'es pos seûr qu'on t'a ormarqué, vu qu'asteur ch'est la mote pou des soyeus d'aller faire des mimisses à l' famile. Si te passes à ç' moumint-là, te n'as pos été orpéré. T'in es quitte pou d'meurer qu'à l' fin d' l'office. Et là, alfeos, te n' sais pos l'air que te deos printe. Si i-a des gins de l' famile que te n' conneos pos, ch'est facile. T'orwettes derrière l' tiête du ceu qu' te salues et te li serres l' main. Mais, si te conneos les gins, te n' sais pos si te deos faire eine baisse, te n' sais pos neon pus l' figure que te deos présinter. Eine risette obin eine triste mine. Eine binette souriante obin eine tiête d'intierremint. Et va-t'in dire eine séquoi ! Te barbotes dins tes dints et l'eaute qu'i n'a rien compris i t' répeond merci. Ch'est mieux qu'ête balou in parlant du défunqué. I veaut mieux n' pos dire que ch'éteot ein beon vivant, qu'on pinseot qu'i-alleot tertous nous intierrer. Si l' mort i-éteot gintil, i feaut éviter d' dire qu'i-aveot du savoir-vife. I n' d'a qu'i-eont l' tour et qui dis'tent qu'i seont sans veox pa d'vant ein si grand malheur. Ainsin, tout i-est dit sans rien dire.

On peut in rire, mais, si on est impoté pa d'vant l' mort, ch'est pasque cha reste ein mystère, que cha peut deonner les finques et nous faire faire des sotries.

L' Grante vadroule

Lexique : raminvrance : souvenir / avoir à r'dire : critiquer / eine séquoi : quelque chose / barboter : marmonner / balou : maladroit / défunqué : mort / avoir el tour : savoir s'y prendre / deonner les finques : faire peur / sotrie : bêtise