30 octobre 2019 par L' Grante vadroule

Pou orconstruire l' Peont-à-Peont, cha n'a pos été tout seu. I-a eine paire de meos, on s'a rindu queompte à l' livraiseon que l' mesure i n'éteot pos tout jusse. i-a ein gonfleu qui-a dit : « I d'a ein peo moins, j' vous l' mets quand même ? » I vouleot faire acroire qu'i manqueot trinte chintimètes au tablier du Peont-à-Peont. I-a ein eaute fouteu d' gins qui-a rajouté qu'ainsin on areot ein nouvieau Peont-des-Treos.

Mi, je n' saveos pos qu'ein peont cha aveot ein tablier. J' n'ai jamais connu qu' l'écorchwé de m' manman ou de m' gramère. I d'aveot d' tous les couleurs, et même des à fleurs. In busiant à cha, je m' raminvre tout ç' que m' gramère elle faiseot avec. Bin seûr, ch'éteot d'abord pou n' pos brouser ses habits qu'elle aveot pa d'zous. Mais elle in aveot plein d'eautes usaches. À l' cuisine, elle s'in serveot comme manique pou impoigner les bideons trop brûlants à orsaquer du fu. Elle faiseot du vint avec pou activer l' fu si n' preneot pos bin ou si l' tarte i-éteot trop queaude. In allant au gardin, elle metteot d'dins les légueumes, les preones et les puns. Ch'éteot eine mante pou l' transbahutache du beos ou des penn'tières. In orvénant du poulailler, elle faiseot attintieon in ram'nant les oués. Si faiseot freod, elle intorténeot ses mains d'dins pou les réqueauffer. Si eine séqui buqueot à l'huche et qu'elle véyeot de l' poure su eine armoire, cha li serveot d' loque à poussière avant d'aller ouvère. L' meilleu d' tout, ch'est quand j'aveos l' cœur au potache obin que j' m'aveos fait eine coichure, elle frotteot mes larmes avé un couan de s'n écorchwé. Asteur, l'AFSCA i direot que ch' t'ein nid à micropes. Pou mi, cha d'meure eine banse d'amour.

Adeon, j' pinserai à tout cha quand j' vas traverser l'Esquéaut in marchant su l' tablier du Peont-à-Peont.

L' Grante vadroule

Lexique : gonfleu : blagueur / peo : peu / écorchwé : tablier attaché à la taille / busier : penser / se raminvrer : se souvenir / brouser : salir / orsaquer : retirer / fu : feu / preone : prune / pun : pomme / mante : panier / penn'tière : pomme de terre / oué : œuf / intorténer : entortiller / séqui : quelqu'un / buquer : frapper / huche : porte / poure : poussière / avoir le cœur au potache : être triste / coichure : blessure légère / banse : grand panier