11 décembre 2019 par G.D.O. Hédéba

Pou l' Cabaret d' Viva for Life du verdi vingt décimpe (que cha s' passe à 20h à l'Hôtel de Ville, réservations au 069/59.01.39), on a décidé d'orprinte eine paire de cancheons d' nos amisses qui seont partis trop teôt. Cha m'a fait orpinser qu' no n'amisse Rudy Sainlez i f'seot aussi des tesques pou l' Proximag, et j'ai ortrouvé ç'ti-chi, qui moutre tout l'esprit et les jeux d' meots d' Rudy. Beonne lecture !

A boire et à minger...

Tous les passionnés de l' gastronomie i l' saftent : ed' tous les arts, ch'est l'art culinaire qui norrit l' mieux s'n'heomme.

Quand j' busie qu'à m'n'âche, j'ai d'jà passé béteôt dix ans à minger, autant s' dire qu'i feaut rinte ces momints agréapes ! Dins l' temps, ein bien pinsant, ch'teot ein bien pansu, qui trimballeot s' greos vinte aussi fièr'mint que s' feimme elle porteot s' grossesse.

Alors n'ayeons qu'ein réflexe : succomber à l' tintatieon ed' peur qu'elle s'in va. Ras l' pompeon des ayatollahs de l' minceur, j'ai essayé weight watchers : in quatorsse jours, j'ai perdu deux s'maines. Marre des partisans de l' diète éthique et des végétariens purs et durs. Et les superstitieons ! Mi, l' seul cas qu' cha m' gêne d'ête à treisse à table, ch'est quand ç' qu'i n'a qu'à minger pour dousse.

Multiplieons les tours d'étables et les veillées au coin du pot-au-feu. I-a acor des bouchers qui feont partie de l' race des saigneurs, qui livrent à t' maseon. El' mien i dit : "Pour faire ein beon pâté, i feaut séparer l' beon groin et livrer". S' feimme ch'est l' reine de l' bavette, eine fille du terroir, origine et traçabilité garanties. Vingt ans d' beons aloyaux services. Leus espécialités françaisses, ch'est l' pâté d' Foix et l' culotte de Pau. (L' ceu qui-habite à Pau et qui-a parfois mau à s' foie, i manque de pot)

Et pou m'indormir, d' timps in temps, j' débouche eine boutelle de Mouton-Rotschild, j' m'in sers ein balleon, puis ein deuxième, puis ein troisième, et ainsin j' m'indors in comptant les Mouton. A l' maseon, on m'appelle "biseon fûté", pasque ch'est mi qui fais sauter les boucheons.

Ein éaute adache : ch'est au pied du Saumur qu'on veot l' Mâcon.

G.D.O. Hédéba