22 janvier 2020 par Catoupi

Au momint qu' vous lirez ces lines (comme on dit dins les gazettes quand l'artique i-est écrit avant qu'ein évèn'mint i s'passe), vous arez p'tête déjà eu des beons échos du prumier p'tit cabaret d' janvier, vu qu' ch'éteot verdi 17.

Et si vous voulez aller l' vir, bé i-a acor treos séances du wékenne qui vient : verdi 24 (foque pou les heommes) et saim'di 25 (pou les dames avec) à la Halle aux draps su l' grand-plache de Tournai. Ch'est à chaque feos à 20h, et on ouvère les portes à 19h, ainsin vous pouvez arriver à vo n'aisse, vous installer pour in boire eine, et raqueonter l' queompte avant qu' cha comminche.

A partir d' ceulle ainnée-chi, si vous acatez vo carte d' mimbre à quinze euros, vous pouvez rintrer au cabaret d' janvier, au cabaret d' mars et vous arez aussi eine intrée au Cabaret-Revue d'octope. Autant dire que ch'est pou rien, cha orvient à cheonq euros par spectaque. Et pou les moins d' vingt-cheonq ans, ch'est foque cheonq euros pou l' carte d' mimbre.

Vous d'vez vous dire : « I n'sait pos queompter, i-a dit treos séances et i n'a donné qu' deux dates ». Bé neon : comme on l'a d'jà fait l'an passé, on va in puque faire eine séance au villache : cha s'ra du diminche 26, à 16h (ouverture à 15h) à Ere, au chintre culturel et sportif, à l' rue d' l'église. Pour y aller, i suffit d' printe l' chaussée d' Willemeau et tourner à gauche à l' Porte d'Ere. Là avec, cha s'ra pour ein public mixte. On peut aussi printe l' carte d' mimbre, ou bin jusse payer l'intrée d' nouèf euros si on pinse qu'on n'ira pos in mars ou in octope. Mi j' trouèfe que cha s'reot dammache et qu'i veaut mieux printe l'carte tout d' suite.

Pou finir, i feaut aussi savoir que notélé i n' vient pos filmer ç' queop-chi à causse qu'i seont pris pa l' festival du Ramdam. Adeon, n' disez pos : « Ch'est rien si on n' va pos vir el' Cabaret, on l' voirra à l' télé ». Cha avec, cha s'reot dammache !

À l'orvoyure !

Catoupi