19 février 2020 par Tignasse

Banjour mes gins, in début d'ménache avé m'Gertrute, dins l'quartier, on éteot dins les prumiers à avoir el' téléphone à s'maseon. Que d'facilités pou l'époque : on d'veot pus sortir à la cabine et seurtout, on n'deveot pus t'nir ein kirielle d' pieches à foute dins l'bastrinque tout in f'sant attintieon à n'pos avoir el' siffleot copé. Alfeos, des visins v'neot'tent à l'maseon pour appeler de l' famille in déhors de l' zeone du préfixe pasqu'à l'cabine, les pièches déquindeot'tent comme dins ein juke-box. I d'aveot toudis ein qu'ch'éteot eine vraie confesse, ein éaute qui f'seot l' journal parlé et qu'i falleot mette à l'cour pou ti souper tranquille. M'Gertrute noteot les temps d'communicatieons, carculeot s'pétite commissieon pou l'déring'mint et tertous i-éteot bénaisse.

Avé l'arrivée du GSM, tout cha ch'est fini, par queonte, i-a toudis autant d'ach'vareus mais, qui t'seonn'tent. T'attrapes d'z'orprésintants d' tous les sortes, qui t'deonn'tent ein prix hors concurrince et qu' deux jours après, t'as l'ceu de l' compagnie d'avant qui t'orfait ein nouvieau prix et qu'à la fin, te n'sais pus d'quoi ! J'ai même appris qu'final'mint, ch't'eine cintrale automatique qui fait les luméreos, même qu'i-z'appell'tent d'l'étringer. Du queop, ch'est cha qu't'as bin souvint ein blanc quand te décroches. Eh bé, si mes luméreos du lotto sorteot'tent aussi souvint que m' luméreo d'téléphone, i-a bin lommint qu' je m' lomm'reos Crésus.

Acor hier, que j'décroche, j'aveos campris qu'ch'éteot cor ein soulant, du queop, voulant rire ein queop, j'déposse l' cornet et j'appelle m' Gertrute : « Téléphone ! ». Commint qu'elle alleot tirer s'plan ? Mo dieu, l'ovlà qu'i s'pointe, elle brayeot tout plein qu'elle p'lureot les ogneons... « Alleo ? snif ...Ed quoi ? Si j'aime bin l'vin ? Snif... Ah tins bin seûr ! ». Ch'éteot pou du vin ... Je m' dis qu' j'areos dû warder l'appel ! Mais v'là m'Gertrute qui s'esplique d' pus belle : « Ah, vous m'n'camperdez pos bin c'que j'dis , snif, bé ch'est pasque j'sus ichi avé mes ogneons, snif, et qu' t'appelles à Tournai tins vingt neoms ! ... Ed quoi, snif... Si j'voudreos trinte-six boutelles ed' Côte du Rhône ? Bé neon neon, snif... J'ai pos b'soin d'cha ! ». Ah neon ... Elle n'alleot pos m'faire cha... « Snif ... Bin si qu'j'aime bin l'vin mais j'veux pos d'vos boutelles mi, in puque je l' fais mi-même, snif ... Ouais Mossieu, j'ai eine vigne, snif ... Ouais, dins m'gardin, snif ... Si j'in fais beauqueop ? Bé j'sais pos cor el' dire, snif... J'ai seul'mint planté ein arpe à rogins qu'l'été passé, snif... Si je m' fous d'vous ? Tins bin seûr, snif, t'es ichi au pays des fouteus d'gins, snif ... Et j'sus seûr qu'asteur, te vas infin nous foute la paix ! » Et elle a raccroché tout d'eine in m'disant : « C'ti-lal, i n'orvenn'ra pus ! ». Qu'elle ortourneot à s'cuisine, je m'diseos : « M'ovlà eu par l'ceusse que j'vouleos avoir ! ».

Tignasse