Bravo, haro

Dins ces moumints d’confin’mint, ch’est bin difficile alfeos d’trouver l’beon meot pou rire ein p’tit queop. Même si, i feaut bin l’dire, ch’est d’optimisme qu’on a b’soin.

Ainsin, inserrés à s’maseon on n’a souvint que l’télévisieon pou s’distraire et i feaut bin dire qu’si t’acoutes les infos ch’est pos cha qui va t’deonner l’moral.

Hurus’mint qu’no télé i-a r’mis à l’antenne des inciens cabarets pou s’raminvrer tous ces beons moumints, alors bravo à eusses.

Tant qu’on est à des bravos, j’vas bin seur in profiter pour dire mille, queo que j’dis, dix mille, chint mille, ein millieon d’bravos à tout l’meonte médical d’pus l’méd’cin d’famille jusqu’au méd’cin du milieu hospitalier in passant par l’ s’infirmières dont on n’dira jamais assez l’dévouemint . Ces feimmes courageusses elles seont in prumière line et in danger tous les jours, elles le sav’tent bin, mais elles seont là. Eine vraie l’ceon d’humanité ! J’ose pos imaginer dusqu’on in s’reot sans l’meonde médical alors ouais, bravo, bravo. Et j’mets dins s’bravo avec tous les ceusses qui seont au freont dins l’milieu hospitalier d’pus les feimmes de ménache, l’aides soignantes mais aussi les pharmraciens bin intindu. Bravo

Bravo aussi à les ceusses qui veont à domicile pou soigner les vielles gins ou acore pou les ceusses qui seont à leu côté dins les homes et qui maintienn’tent l’santé et l’moral .

Mais alors dus que j’suis l’ cul, ch’est quand j’apprinds qu’i d’a qui eont l’toupet d’porter plainte conte les méd’cins des soins intinsifs qui seont su les g’noux et qui eont eaute queosse à faire que d’s’occuper d’ces imblavés qui sav’tent mieux que l’z’eautes …in restant bin à l’abri eusses.. Haro su ces culottés, ces gins qui n’pins’tent qu’à eusses mi j’pinse qu’ch’est conte eusses qu’on d’vreot porter plainte pou incivisme.

In parlant d’incivisme, haro aussi su l’inconscients qui mettent l’z’eautes in danger in n’respectant pos l’isol’mint. A m ’meote qui leu manque eine séquoi….

Mais j’préfère orvénir aux bravos. Bravo à tous ceusses qui feont marcher l’vie sociale : dins les magasins, à l’poste, dins les crèches, pou l’propreté publique depuis l’caissière jusqu’au facteur in passant pa l’z’éboueurs, les libraires, les puéricultrices, les p’tits producteurs, nos policiers qui seont aussi in prumière line souvint sans protectieon.

Bravo aussi à tous les ceusses qui discrèt’mint rintent service autour d’eusses : les gins qui assistent leu visins, tous ces p’tits queops d’fil anonymes à les gins tous seus, les ceusses qui cous’tent des masques et seur que j’in oblie. Qu’ceux-là i n’m’in veult’ent pos.

Alors j’vas finir par deux haros et deux bravos.

Haro su no minisse fédérale de l’santé qui n’a pos su prévoir l’pénurie d’masques, d’gel, d’tests, d’matériel médical et qui, pire acore, n’a pos l’air d’asseumer.

Haro su no système qui veut qu’on deot faire avec autant d’ministres différints pou s’occuper de l’santé. Va t’in trouver eine cohérince avec autant d’gins !!!!

Mais bravo aux chercheurs qui s’démèn’tent pour trouver des solutieons, aux industriels qui canch’tent leu line de productieon pou fabriquer masques, gel et protectieon.

Bravo aussi à vous eautes tertous qui respectez l’confin’mint, qui faisez preufe d’civisme, d’invintieon pou garder l’moral d’tertous in cantant, in inveyant des messaches, in imaginant d’s’idées originales pou rester in contact.

Perdez soin d’vous, des ceusses à qui vous t’nez, perdez soin d’tertous et quand tout cha s’ra derrière nous eautes n’obliez pos c’que vous d’vez à ceusses qui eont m’né l’combat conte c’ virus qui a bin et va bin canger no vie.

Cha l’ ira mieux demain

Pichoulit