Grand nettiache

Nos grands-parints et même acore les générations d’avant i s’aveotent l’habitute d’faire l’ grand nettiache pou les Pâques ;

Du queop avé l’confin’mint on a r’mis l’traditieon à l’honneur et on s’a mis à faire l’grand nettiache. On a r’sorti les séeaux, les brouches, les wassinques, l’ieau d’Javel, l’saveon d’ Marseille, l’saveon Pollet , l’ saveon noir et tout c’qui fait de l’mousse.

M’feimme elle a d’abord nettié tout l’maseon à grantes ieaux qu’t’areos béteôt cru que l’rieu d’Barches i-aveot débordé jusqu’à l’maseon.

Après cha, elle a tout orsorti des armoires, on a r’fait l’vaisselle des verres et d’s’assiettes qui aveot bin dix ans qui preneot’ent l’poussière au feond d’eine armoire qu’on n’saveot même pus qu’on aveot tout cha. Et comme on n’pouveot pos mette tout au lafe-vaisselle vu qu’ch’éteot treop fragile, j’ai été beon pou tout réssuyer, j’n’aveos pus l’escusse d’dire que j’aveos eine réunieon…

Après m’feimme elle a eu l’idée d’nettier l’frigo et l’congélateur à feond pou eine feos comme elle dit même si elle l’aveot fait i-a quinze jours. Et vas-y que j’te sors tout.. et pou n’pos briser l’chaine du freod, on a mis les surgelés dins eine couverture l’temps du nettiache . je n’saveos pos que pou rester bin freod, i falleot s’mette dins eine couverture mais soite…

Après cha, on a nettié les carrettes d’pus l’vite-poche jusqu’à les pneus, si, si vu qu’on n’peut pos sortir on n’est pos là d’les salir.

On a rattaqué après l’chalet d’ gardin qui-aveot là d’dins ein fourbi qu’on a mis treos jours à tout sortir et …quate jours à tout rintrer. Asteur, on pourreot béteot aller minger d’dins.

On a alors r’sorti l’karcher et on a fait l’terrasse, on s’a si bin appliqué qu’asteur on est beon pou orfaire les joints..

Eine feos l’terrasse finie, on a qu’minché à crueauder tout l’gardin, j’ai même copé les bordures …mais avec les éciseaux d’couture de l’feimme, j’te dis pos l’sermeon qu’j’ai eu après cha.

L’semaine passée, on s’a mis à ranger l’guernier. Queu n’affaire, on a même ortrouvé des cadeaux d’mariache acore dins leu n’imballache et comme m’feimme elle veut tout ruer et qu’mi j’veux tout t’nir, i-a-veot d’l’imbiance à l’maseon au point qu’tout i-a resté in plan…

D’main, on fait l’cave… j’espère que j’vas ortouver des beonnes boutelles, histoire d’noyer no chagrin mais sans exagératieon, bin seur, vous m’connaissez.

Mais c’qui a d’seur ch’est qu’ no maseon elle est fin prope , bin vite qu’on peut orchevoir nos amisses… pou r’salir tout cha.

Pasqu’eine maseon prope pou n’orchevoir perseonne, cha n’a pos beauqueop d’sens !

Pichoulit