Je m’ sins perdu

Je n’ sais pos ti zeautes, mais mi, i m’arrife d’avoir l’ tiête d’ein caché-perdu.    

J’ sus tourminté avé ç’ virus qui deonne des russes.           

Tout à n’ein queop, j’ai d’s angouches. Cha vient d’ pa d’zous et cha ormeonte jusqu’à m’ gorche, comme les vapeurs d’eine feimme à s’ ménopause. Infin, j’ dis cha, j’ n’in sais rien vu que j’ sus t’ein heomme, mais on m’ l’a raqueonté.          

J’ n’ai pus d’ jour, j’ n’ai pus d’heure. Acore hureux qu’i-a d’ timps in temps du solel pou orconnaîte l’avant et l’après-deîner.

J’ dors quand j’ sus mate, j’ minge quand j’ai faim. Pou ç’ qu’i-est du liquide, j’ sus prévoyant : j’ beos toudis avant d’avoir seo.

Ch’t’ainsin qu’après ein beon verre, j’ai fait m’ pétit niquet pa d’vant m’ télé. Au moumint qu’ je m’ dérinvielle, j’ veos dins l’ poste l’imache d’ deux qui s’ feont des baisses. Pos des baisses à pinchette, neon, neon, des baisses à bouquette, des vraies, des bin guilantes. Acore dins m’ dormache, j’ berle “Arrêtez ! I n’ feaut pos ! I-a l’ virus.” Ormis de m’ saisissurte, i m’a faulu cheonq minutes pou orprinte m’n haleine fellemint que m’ cœur i balbuteot.

Pou m’orquinquer, j’ téléphone à eine amisse pou li dire qu’ je d’viens à mitan seot avé ç’ corona. Tout ç’ qu’elle a treuvé à m’ dire, ch’est : “ À mitan seot ? Ch’est qu’ cha va mieux, adeon. ”

Et on appelle cha d’s amisses !

Et v’là qu’asteur, ch’est l’ déconfinemint. J’ sors pou l’ prumière feos. Dins Tournai, cha va, les gins i feont effort. Is eont leu masque quand i veont dins les boutiques. N’impêche, je n’ me sins pos à m’n aisse. J’orwette d’ tous les côtés si les gins i mettent leu main su les affaires à vinte, si ronquiell’tent et touss’tent dins leu queute, si grattent leu nez… Je n’ sus pos tranquille. Ch’est comme si chaque marchandise i brûleot, je d’salte du boutique comme ein voleu qui part avé l’ caisse et j’ rinte à m’ maseon tout trannant. Je n’ sus pos seûr que j’ vas acore osoir wider de m’ baraque.

L’ Grante vadroule

Lexique : russes : misères / angouche : angoisse / mate : fatigué / niquet : sieste / s’ dérinvier : s’éveiller / baisse à pinchette : baiser en pinçant les joues / baisse à bouquette : baiser sur la bouche / guiler : couler comme du sirop / berler : crier / balbuter : palpiter / ronqu’lier : respirer bruyamment / queute : coude / d’salter : s’enfuir / tranner ; trembler / wider : vider, sortir