D'Henri Thauvoye

1.

Acoutez cell’ nouvelle :
Ein bieau jour, au matin,
Au momint qu’je m’ révelle,
V’là qu’j’intinds du potin !
Quoi c’que ch’est d’cha qui gratte ?
Tins ! tins v’là mieux ! qu’je m’dis.
Si cha n’est pos ein’ ratte,
Seur’mint, ch’t’ein’ gross’ soris !...
Mais mi j’l’arai,
Pasque j’ mettrai…

Refrain

Ein’ belle attrape à soris,
Cha n’va pos fair’ beauqueop d’ plis,
Eine avé des beons orsorts
Que l'soris n’ part pas déhors !
Ah !
Ein’ belle attrape à soris,
Cha n’va pos fair’ beauqueop d’ plis,
Eine avé des beons orsorts
Quel l’soris n’ part pas déhors
Soris ! Soris ! Belle attrape à soris

2.

J’saveos que j’d’aveos eine,
J’pinseos mette m’ main d’ssus :
Pou l’ trouver je m’ démène
Vingt neoms ! je n’l’aveos pus !
Cell’ soris, j’ pourreos l’ printe,
Si j’sareos dusqu’elle est…
Mais si j’ devreos attinte,
Tout s’nid s’reot bétéot fait !...
N’a qu’ein moyen,
I faudra bin !..

Refrain :

J’ veux eine attrape à soris,
Je n’ vas pos r’wettier au prix :
Eine avé des beons orsorts
Que l’ soris n’ part pos déhors !
Ah
J’veux eine attrape à soris
Je n’ vas pos r’wettier au prix :
Eine avé des beons orsorts
Que l’soris n’part pos déhors !
Soris ! Soris ! Belle attrape à soris !

3.

J’ m’in vas dins ein' boutique,
Là dusqu’on in vindeot…
A n’ein’ viell’ femm’ j’esplique
Queu modèl’ qu’i m’ falleot
Ell’ dit :-j’ai vo n’affaire,
Attindez ein momint…
In v’là ein’ pos trop tchière !
Bé prenez –l’ hardimint !...
Mi, j’l’ortourneos,
Je l’mimbourneos !...

Refrain :

-Queull’ vielle attrape à soris !
Mais combin c’ qu’ell’ d’a d’jà pris ?...
I n’seont pus beons les orsorts :
L’soris foutra l’camp déhors !
Ah
Queull’ vielle attrape à soris !
Mais combin c’qu’ell’d’a d’jà pris ?...
I n’ seont pus beons les orsorts :
L’soris foutra l’ camp déhors !
Soris ! Soris ! Vielle attrape à soris !

4.

Puis, acor pus habile,
In partant d’cell’ maseon.
Dins l’ boutiqu’ d’ein’ jeon’ fille,
J’arrif’ sans pus d’faceon !
-J’veux eine attrap’, mam’zelle
Vous m’ direz quoi c’ qu’elle veaut ?...
Mossieu, j’ grimpe à l’ étchielle,
Vous voirez c’qu’i vous feaut !...
Ell’ me l’moutreot
Et ell’ diseot :

Refrain

-R’wettiez c’n’attrape à soris,
J’vous l’ laiss’rai pour ein beon prix !
Ah ! j’in répeonds des orsorts
L’soris n’ fil’ra pos déhors !
Ah
-R’wettiez c’n’attrape à soris,
J’vous l’ laiss’rai pour ein beon prix !
Ah ! j’in répeonds des orsorts
L’soris n’ fil’ra pos déhors
Soris ! Soris ! Belle attrape à soris !

5.

In l’veyant j’dis tout d’suite :
-Vo n’attrape a du beon !
Est-c’qu’elle est bin solite ?
-Bé cha qu’ell’ me répeond !
Ch’est de l’ beonn’ marchandisse.
Même, avant de l’ payer,
J’vous l’ dis in tout’ franchisse :
Vous pouvez l’essayer !
Ch’est mêm’ vo dreot :
Mettez vo deogt !...

Refrain :
Et , dins c’n’attrape à soris,
Ch’est l’ débout de m’ deogt qu’j’ai mis !
I serreottent les orsorts,
J' saveos pus l’ saquer déhors !
Ah !
Et, dins c’n’attrape à soris,
Ch’est l’ débout de m’ deogt qu’ j’ai mis
I serreottent les orsorts,
J' saveos pus l’saquer déhors !
Soris ! Soris ! Belle attrape à soris !