11 septembre 2008 par Catoupi Magazine

Tous l’z’amateurs ed’ fotbal i z’eont été estomaqués par nos jeones fotbaleus à les jeux olympiques. I-aveot d’l’inthousiasme, du cœur, du cran ; i seont bramint culeottés, ces p’tits rot’leots ! C’qui-est dammache dins ç’ bazar, ch’est tous ces affaires avé les jeueus qui n’eont pos pouvu l’y aller, ou bin qui n’eont pouvu qu’ jeuer ein match ou bin deux. Tout cha pasque leus clups i n’ vouleot’tent pos qu’i veont s’ blesser, ou bin qu’i-aveot des matchs ed’ coupe d’Europe qui z’éteot’tent prévus. Ch’est vrai que l’ FIFA, l’UEFA et l’ CIO i z’areot’tent pouvu s’arringer à l’avanche, questieon d’ calindérier.

Mi, l’ ceu qui m’a fait l’ pus plaisi, ch’est Vincent Kompany : i-a t’nu tiête à s’n’équipe d’Hambourg, pou li rester in Chine et continuer d’ jeuer avé les diablotins. Bravo, Mossieu Kompany ! Pasqu’i n’ d’a pos bramint qui z’areottent fait parel…

Malhureus’mint, l’ fédératieon belche, elle ne l’a pos sout’nu. Et cha, ch’est l’ bouquet ! Pour eine feos qu’on a ein jeueu (et ein beon avec cha !), qui veut porter l’ mailleot d’ l’équipe belche, on préfère éviter eine amende et l’ rinvoyer à s’ baraque…

A l’heure actuelle, les jeones fotbaleus i n’ pinstent qu’ à rimplir leu portefouèle, in allant jeuer à l’étringer ; cobin qu’i d’a qui feont banquette ? Et qui pass’tent à côté d’eine belle carrière, pasqu’i z’eont eu les yeux pus gros qu’ leu vinte ?

J’ai lu eine séchu qu’ Fellaini, i n’areot pos eu s’ transfert à Everton si i-areot d’meuré à Pékin. Pour Kompany, cha té l’ cantraire : comme i-a voulu d’meurer avé les diablotins, on l’a mis su l’ banc et après on l’a trinsféré. Dites-me ein p’tit queop : i-a de l’ logique là-d’dins ?

Li, au mouins, on peut dire qu’i jeue avé s’ cœur, pou s’n’équipe, et qu’i n’ jeue pos seul’mint pou gagner des liards. I-est assez malin pou savoir l’ valeur de l’argint.

Par queonte, i d’a d’z’éautes qui gann’tent bramint d’ liards, et qui z’os’tent dire : « c’t’argint, je l’ mérite, ej’ ouèfe dur pou l’ gagner »…

Eh bé à m’meote qu’i d’a bramint dins les supporters, à ç’ soir, qui ouèftent bin pus dur, pou gagner bramint moins d’liards que ç’ jeone effronté que j’ préfère n’ pos dire es’ neom…

Faudreot p’tête l’invoyer eine sémaine ouvrer à l’usine, ou bin ramasser les poubelles, i sareot ç’ que ch’est d’ouvrer, … et d’ gagner s’vie « à la dure » !

Beon, pou finir, j’ préfère orpinser à Kompany (que ch’t’ein vrai Belche), à les diablotins, qui z’eont fait ein bieau tournoi olympique, et au match d’à ç’ soir que nos jeueus i veont seûr’mint gagner. Allez les Sang et Or !

Catoupi

< Précédent		Suivant >