16 septembre 2008 par   Clovis  

Vous êtes dins les « moins jeones » et vous voulez vous raminvrer l’temps passé ? Vous avez moins d’chinquante ans et vous voulez vir commint c’qu’on fêteot l’Cancheonne Wallonne « dins l’temps » ?

Alors, av’nez mes gins, av’nez tertous d’vant l’Pichou Saint Piat l’ diminche 21 sep’timbre. On c’mminche à dix heures par l’Hommache au Pichou. I-ara seûr’mint ein p’tit discours et puis on cant’ra eine paire de cancheons d’ circonstince : « Les Tournaisiens sont là » et « Mon cœur est rouge et blanc » et puqu’on s’ra nombreux, puqu’ nos veox s’reont intindues dins tout l’quartier.

Après cha, tout l’meonte i partira in cortèche derrière l’Harmonie des Sapeurs Pompiers, nos amisses de toudis. On s’balad’ra dins les rues de no vielle chité comme dins l’temps, i-ara no drapeau et l’ ceu des pompiers comme dins l’temps. Bin seûr, bramint d’nos inciens i n’ seont pus là mais pour nous, leus successeurs, et pour vous qui l’z’avez connus, j’ suis seûr qu’i s’reont présints dins no cœur et dins no tiête.

On n’ va pos réaliser un esploit sportif, cha n’est pos eine marche Adeps éné ? Neon, on va aller fin à s’aisse jusqu’à l’Maseon d’ la Culture. Là, au mitan d’no belle et grand’ expo, à onze heures, cha s’ra l’ormise des prix « Prayez ». Les prumiers prix, i cant’reont ou bin i direont c’qui-z-eont composé. Et adeon, on boira ein p’tit godet comme direot René. Mais cha n’est pas acor fini, savez. Pasque, pou corser l’ programme, no n’amisse Bruno Delmotte i-organisse l’ même jour, eine fiête au picard. I-ara des sociétés d’ichi comme l’Bistreot Patoisant mais aussi des ceulles du Nord de la France. Rindez-vous à quatre heures dins l’Salle Lucas, i-ara ein podium libre où tous les artistes du picard i veont s’produire. I-ara du lari et d’l’amus’mint. Cha bin seûr, cha n’est pos comme dins l’temps mais, tout queompte fait j’pinse que nos inciens i-z-areottent aimé cha.

Allez mes gins, n’obliez surtout pos no rindez-vous : diminche qui vient à partir de 10heures !

Clovis

< Précédent		Suivant >