14 octobre 2008 par Picard d'ichi 

Je ne sais pos si t’es comme mi, mais, mi, eine feos du soir arrivé, quand j’rinte à m’maseon, j’aime bin d’m’assire ein p’tit queop dins m’divan et d’lire l’gazette.

Ch’est vrai, qu’alfeos, même j’m’indors.

Et ch’est à ç’moumint là que l’téléphone i seonne. . L’temps que j’morlèfe, que j’orplie l’journal dusque j’éteos in train d’faire l’meot croisé et me v’là à l’apparelle.

Des queops l’luméro i s’affiche et comme j’conneos l’ceu des soyeux, j’fais simblant que j’sus pos là mais mes gins i z’ insistent tell’mint qu’j’ai pu vite fait d’décrocher. J’ai d’jà essayé d’printe eine eaute voix du ginre : « La madame elle n’est pos là » mais comme m’n’ accint espagnol, i a des airs d’picard, j’sus vite orconnu.

Adeon, j’décroche mais alfeos, ch’est pos affiché, alors j’décroche avec. Et j’intinds.  « Bonjour, mossieu, commint t’allez-vous ? » te direos béteôt qu’ch’est eine connaissance et te li d’mandes «  Qui qu’t’es ? »  «  Ch’est Nathalie de l’firme Machin. T’as été contint du dernier achat qu’t’as fait chez nous eautes ? » Bé, je n’me souv’neos pus qu’j’aveos acaté du vin à t’boutique Et bla bla bla elle te d’mintes des nouvelles ed’tes infants, de t’feimme, de t’santé comme si ch’éteot eine vielle connaissance.

Mais dès que t’li dis que cha n’t’intéresse pos, ch’est béteôt tout jusse si te t’fais pos ingueuler.

Mi asteur, ch’est fini, j’queope court. Du vin ? Bé i-a des beons magasins à Tournai dusque t’es bin conseillé, adeon pos b’soin d’l’acater pa téléphone à des gins que te n’conneos pos. Et ch’est l’même pou des boutiques que t’deos aller à deux pou ti avoir ein cadeau que te n’saras pos quoi faire, avec sineon de l’mette à l’prochaine tombola de t’paroisse. Ou bin     acore pou canger d’opérateur au téléphone que d’toute facheon te n’y comprinds jamais rien. Eine eaute feos, ch’est pou réponte à eine inquête que t’es pos seur si ch’est pos pou savoir quansque te t’in vas in vacances ainsin on est seûr qu’i-a personne à t’maseon et qu’on peut v’nir tout voler à s’n’aisse…

Quand ch’est pos que l’téléphone d’mes gins i arrife au moumint où te viens d’t’installer à l’toilette et que te rhabilles bin vite…pou les intinte ou pou arriver treop tard avé t’marreonne su tes gampes…

Mais l’dernière ch’est cor pus vexant, ch’teine qui téléphoneot d’Madagascar ou d’eine séchu par là et qui s’adresseot espécial’mint aux couples d’pinsieonés d’Tournai, neon mais queu culot, j’l’ai rimballé in moinse d’deux, pasque j’oeufe acore et mi, ch’est pos comme elle, j’n’imm….. pos les gins du diminche au matin pou m’proposer de m’faire avoir…

Vraimint…i m’soûl’tent

L’Picard d’ichi