4 novembre 2008 par Clovis  

C’gardin-là, i n’ conneot pos l’pluèfe, ni l’ gélée et les plantes qui vif’tent là, elles sont bin apouchennées. Pou l’ trouver, pos b’soin d’ cacher bin leon pasqu’i s’muche dins ein bieau p’tit villache, tout au nord d’ no Wallonie Picarte, à deux pas du pays des Nordisses.

M’ feimme et mi, on rind visite à ses propriétaires, Carine et Jean, au moins deux queops par an. Au printemps pour d’aller queusir les fleurs qu’on va mette su no terrasse et pour l’Toussaint. Des deux « escursieons » ch’est bin ceulle d’auteomne  que j’ préfère. Les deux grandes serres, elles sont rimplies d’ potées d’ chrysanthèmes vraimint magnifiques. Des classiques avé des grantes fleurs et des pomponettes « XXL » guéaunes, cuivre, or, mauves, rosses, d’s espèces qu’on n’trouèfe nur’vart ailleurs. Quand j’dis qu’on vient ein queop pou l’Toussaint, j’ devreos puteôt dire deux pasqu’on va d’abord queusir nos fleurs quinze jours avant. Diseons qu’ainsin no plaisi i est doupe…’

Ichi pos d’fleurs « industrielles » qu’i-eont voyagé, serrées commes des saurets dins des camieons. Ichi, on sème sur plache et on élèfe les plantes tout au leong d’l’ainnée, avec bramint d’ soin et cha fait eine rute différince vous pouvez m’croire éné. Pasque les plantes, j’pinse que cha orsint bramint pus qu’on n’pinse. Ch’est comme les gins, cha vit mieux quand on les aime et qu’on les respecte. Ichi ch’est bin souvint l’patreonne qui vous orcheot in perseonne et avé l’ sourire. Elle n’est pos avare d’esplicatieons su s’n ouvrache et su ses plantes et toudis prête à vous assister si vous avez b’soin d’ consels pour vo gardin. Infin, vous savez asteur pourquoi qu’on est rabis d’ ceulle interprisse toudis bin fleurie et qu’on n’voudreot pus jamais canger d’fournisseur.  Ah ! J’ alleos oblier d’ vous dire, avant d’ête horticultrice, Carine elle éteot infirmière.

Mi, j’dis qui-a des plantes qui eont bin de l’sanche.

Clovis