28 octobre 2008 par Clovis 

L’aménag’mint d’ no Grand Plache i-a dix ans, l’ rénovatieon des quais en 2006, cha a d’jà orsaqué eine masse de plaches pou l’parkinache.

Et asteur, l’ovlà  Mossieu Michelin qui arrife avec ses s’melles in caoutchouc. S’app’ler ainsin et avoir l’idée d’ ruer acor eine masse d’auteos in dehors du quartier Noter- Dame, i feaut l’faire éné !

Et on intind d’jà les commerçants qui comminch’tent à canter l’chœur des esclafes. Esclafes, esclafes, ch’est pétète eine millette  exagéré, m’ gramère elle areot dit l’choeur des lapidés, mais j’ les comprinds. Pour eusses, cha n’deot pos ête fiête tous les jours.

L’parkinache, ch’est bin vrai, l’ovla l’problème liméreo ein à Tournai et on in parle, sans mintir, d’puis pus d’trinte ans. On a bieau s’ délaminter, asteur on m’marche pus bramint mais, comm’ i l’canteot si bin Eloi, « on roule ». Et si on impêche les gins d’ rouler, i restent à leu maseon ou pire i veont dusqu’ i peuv’tent garer leu carrette à leu n’aisse.

L’solutieon, on l’a dit acor pus d’ chint queops, ch’est ein parkin’ pa-d’zous l’plache Reine Astrid. Ch’est l’indreot idéal, au mitan d’ toutes les curiosités et des commerces. I-a treos intrées (ou sorties) possipes et si j’ai bin tout compris, on pourreot infourner pus d’ trois chints carrettes dins c’ bazar-là. Ahais, mais i feaut trouver ein promoteur privé qui dis’tent à l’Ville.

« Qui cache trouèfe » comme dit l’éaute ! Asteur, si  on in trouèfe ein, i n’ feaut pos l’laisser s’in aller savez, pasque même s’i n’s’appelle pos « De Lalaing », ch’est li qui sauv’ra no Ville. Et, sans l’ connaîte, mi j’l’ormercie d’jà !

Clovis