Semaine 45 2008 par Catoupi  

Z'avez d'jà intindu parler d' Catoire ? Ch'éteot l' crieur public au dix-nouévième sièque. Eh bé, ov'là ç' qu'i pourreot dire si i s'reot acor dins nos rues asteur: "Acoutez ichi, mes gins ! Catoire fait assavoir que saim'di huit novimpe, à huit heures du soir à l' maseon de l' culture, ch'est les trois queops !

Cha s'ra l' prumière orprésintatieon d' l'orvue du chint'naire !" Les éautes séances, ch'est du diminche noué, lundi dix, mardi onsse. Et cha r'comminche du wékenne d'après, verdi quatorsse, saim'di quinsse et diminche seisse. A ç' qu'on m'a dit, dins ceulle orvue, on va faire des voyaches dins l' temps. Je n' sais pos à queulles époques qu'i veont nous imm'ner, mais j' pinse qu'on va ête surpris, savez ! El' seule queosse que j' sus seûr (ch't' ein du Cabaret qui m' l'a dit), ch'est qu'à ein moumint deonné, on va ortrouver no n'amisse Catoire que j' viens d'in parler ichi au-d'zeur.

Ainsin, est-ce qu'on va aller au temps des inciens belches ?  Au Moyen-âche ? Au temps de l' Préhistoire ? Au temps des Gaulois ? Au temps de l' Renaissance ? Dins l' futur ? Ou estce qu'on va pus simplemint parcourir el' vingtièm' sièque, que ch'est l' sièque qui-a vu naître el' Cabaret Walleon ? Bé, on voira cha in allant vir sur plache.

Et ch'est toudis mieux in étant dins l'imbiance, que d' l'orwettier à l' télé eine paire de meos après, cha ch'est seûr ! In puque des gins du Cabaret, de l' troupe des acteurs et des musiciens, i-ara aussi l' cercle choral Tornacum qui va canter eine paire de cancheonnes. Et i-ara même des gins d' Mômes Circus et eine troupe de danseurs des Pêcheurs Napolitains qui veont mette acor pus d'imbiance.
Catoire l' fait assavoir: "A m' meote qu'i feaut pos rater cha !" Et Mossieu de la Palisse i rajout'reot:

"L'orvue du chint'naire, ch'est seul'mint eine feos par sièque !"

Catoupi

L'Orvue du chint'naire:
8, 10, 14 et 15 novembre à 20h
et 9, 11 et 16 novembre à 16h.
Réservations téléphoniques au 0032 (0)69
59 01 39: le 6 novembre de 18h30 à 20h30.
Places en vente le jour de chaque représentation.
Attention: le dimanche 16 est déjà complet !