8 novembre 2008 par  L’Infant d’Tournai   Magazine

Bonjour, savez, mes gins.

Et alors, z’êtes fin prêts pour mardi qui vient ? Pasque ch’t’ein évén’mint tout n’même ! Vous s’rindez queompte : l’Sporting d’Anderlecht i va avoir l’honneur d’jeuer contr’ el Foltal Clup de Tournai !

I parait que d’puis ein meos, on n’parle pus que d’cha dins l’capitale. Même qu’i’s eont inveyé eine équipe de télévisieon pou filmer les intraîn’mints d’nos jeueux ! Ah cha, on peut dire qui jeueu’tent greos ! S’imaginez ein p’tit queop qu’les Mauves i’s s’reot’ent sortis de l’coupe de Belgique, cha s’reot eine fameusse buque pour eusses. D’jà qu’leu sponsor i n’est pos in grante forme… et qu’on les sint moins fortiche qu’avant…

Beon, j’vas arrêter d’dire n’importe quoi… Mais cha n’impêche que pou nous-éautes, ch’t’ein grand évén’mint. Ch’n’est pos tous les jours qu’on va jeuer au Parc Astrid. D’ailleurs, les plaches i s’in veont comm’ des p’tits pains. Et les cars i s’rimpliss’tent sans problème. J’pinse qu’i-ara ein fameux défilé d’su l’autoroute ! Eine trintaine de cars à l’queue leuleu cha va ête impressionnant tout n’même !

Mais mi ç’qui m’énerfe là-d’dins, ch’est qu’on n’va pus au fotbal comme on veut. Te deos moutrer t’carte d’idintité pour pouvoir acater l’fameux ticket. T’es t’obligé d’aller in car si t’veux t’ortrouver dins l’tribune avé les supporters tournaisiens. Et acor, on l’s’a mis dins ein virache. In fait, i t’cas’tent dins ein coin et te t’ortrouèfes serré les eins aux éautes. Et si cha cait, i-ara de l’plache dins d’z’éautes tribunes ! Je n’sais pos si ch’t’ainsin dins tous les clups de l’prumière divisieon mais j’trouèfe quand même qu’i’s feont bramint de m’noules. Si t’veux aller vir Lens, infin ch’teot ainsin l’année passée in divisieon 1, te commantes tes tickets et ch’est tout. Asteur i feaut béteôt moutrer patte blanque pour pouvoir rintrer ! Bé cha n’m’éteonne pos qu’i-in a d’pus in puque qui raviss’tent les matches à l’télé !
Infin, c’qu’i’a d’seûr et certain, ch’est qu’pour nos jeueux, ch’t’eine fameusse récompinse et j’sus seûr qu’i veont s’donner pou définte nos couleurs « Sang et Or ».

Nous-éautes au Cabaret, on s’ra in pinsée avec vous pasque ç’jour-là, on jeue l’Orvue du Chint’naire.

Mais vous pouvez ête asseûrés qu’à l’fin du spectacle, on s’fa eine joie d’canter l’Hymne des « Sang et Or » in l’honneur des vainqueurs… On peut tout n’même rêver, neon ?

Mais avant d’s’ortrouver à Anderlecht, l’pus important ch’t’acor l’derby wallon de c’soir cont’ l’Olympic pasque là i-a treos points in jeu !

Allez, à l’feos qui vient, mes gins !

L’Infant d’Tournai

Vous pourrez assister à l’Orvue d’main diminche 9, mardi 11 (si vous n’allez pos au match…) et diminche 16 à 16h, lundi 10, vinderdi 14 et sam’di 15 à 20 heures. Cha s’passe dins l’salle Jean Noté de l’Maseon de l’Culture.
Rinsein’mints : www.cabaretwallon.be ou au O69/59.01.39.