18 novembre 2008 par L’Infant d’Tournai  

Bonjour, savez, mes gins.

Vous n’pouvez pos savoir comme j’ai l’coeur in peine ! Diminche au soir, pou l’dernière feos, l’rideau i-a cait su l’Orvue du Chint’naire ! Pindant pus d’deux meos, on s’a dem’nés pour présinter ein spectaque qui rappel’reot les orvues d’dins l’temps. Et quand ç’que j’vous arai dit qu’i-a pus d’cheonq mille perseonnes qu’i seont v’nus l’vir, vous comperdez que ch’t’ein évén’mint qui-éteot attindu dins l’régieon ! Et ch’est toudis avec ein pinc’mint au cœur qu’on s’in va mette pinte ses habits pou l’dernière feos, même si on est bin seûr contint d’avoir donné bramint d’plaisi à les gins.

Faire eine orvue, ch’t’eine séquoi qui n’s’improvise pos. I-a d’abord l’écriture, que ch’est l’ouvrache des cancheonniers. Après cha, i feaut trouver les acteurs, les musiciens. Puis i-a l’mise in scène, les décors, les réservatieons pou les plaches – que ch’est des bénévoles qui s’in occup’tent, même que sans eusses, l’orvue elle n’existereot p’tête pos -. I-a … acore bramint d’affaires à pinser et à mette à plache pour que tous les gins dins l’salle i pass’tent ein beon momint. Mais j’deos vous dire que su l’scène, on vit aussi des momints inoubliapes ! Vife ainsin pindant deux meos, cha crée des liens d’amitié, pasque l’côté « humain » d’eine orvue, ch’est p’tête eine des clés du succès.

Asteur, i nous rest’ra tous les souv’nirs qu’on pourra s’raminvrer, les éclats d’rire du public qu’on ara acor lonmint dins nos orelles ! Hureus’mint, comme tous l’s’ans, on pourra orvife tout cha su No Télé pindant les fiêtes de fin d’ainnée.

Justemint, in parlant d’no télévisieon de l’Wallonie Picarte, vous savez seûr’mint qu’elle fiête ceulle ainnée ses trinte ans. Et l’trintième anniversaire, bé i va s’terminer verdi au soir par eine émissieon in direct que j’vous conselle d’orwettier pasque si vous nous lisez tous les s’maines, ch’est qu’vous aimez bin l’patois. Alors si ch’t’ainsin, vous n’s’rez pos déçu in ravisant No Télé pasque comme ch’est tout l’Wallonie Picarte qu’i-est in fiête, cha m’éteonn’reot que l’patois i n’soiche pos de l’partie.

Allez, à l’feos qui vient, mes gins

L’Infant d’Tournai