25 novembre 2008 par L’Picard d’ichi  

D’nos jours si t’as pos d’ordinateur ch’est ein p’tit queop comme si te t’ortrouveos tout nu su l’grand plache ein jour des quate cortèches.

Et tertous  i s’ sert de cha comme de l’wassinque pou nettier l’tape après l’repas.
Et t’es dév’nu tell’mint dépindant que quand t’as pos l’connexieon, eh bé, t’direos que l’monte i s’écroule….

Mais les publicistes i-eont bin compris l’affaire.

Quand t’ouvers t’messag’rie eh bé avint d’arriver à lire tes messaches t’as à chaque queop ein publicité du diape acore pus pire qu’à l’mi-temps des matches d’l’Euro à l’télé.

Dexia, Cofidis et j’in passe i vienn’tent pasque cha canche toudis s’mette in plein mitan de t’n’écran que te n’sais pos toudis commint t’in débarasser.

Après cha t’as infin accès à tes messaches mais i d’a ein sur deux qu’ch’est des spam ; j’areos dû acater tout l’viagra qu’on m’a invoyé su m’messag’rie, bé, j’pourreos tourner sans faille à longueur de journée dins les films pornos.

Et je n’te parle pos des liards que j’areos pu faire si j’aveos répondu à tous les messaches des gins qui aveotent eine fortune in Afrique hérité d’leu mon onque qui vint justemint d’mourir  et qui cacheotent ein pigeon pou faire vénir ces liards par ichi et qui aveotent justemint b’soin d’ti pou les rapatrier…

Cha ch’est pou les messaches.

Après cha t’as les moteurs d’orcherche comme i z’app’l’tent cha.

Pratique si te caches après ein hôtel ou eine champe d’hôtes pou tes vacances, te rintes dins l’salon, dins l’gardin, dins l’salle de bain comme pou dire.

Te caches ein indreot pou aller in vacances, ch’est l’même, te veos tout d’suite ce que t’vas vire quand te s’ras là…bonjour l’surpisse….

Et puis i-a core les blogs ou les sites dusque te peux écrire t’n’avisse.

Alors là, bonjour l’délire. Pou mi i d’a qui pass’tent leu journée à écrire, à s’réponte et je n’te dis pos les queops d’pis à l’orthografe qu’on y troèfe….

Quant au contenu, mi j’ai été dernièr’mint su l’site d’eine gazette dusque chaquein i pouveot donner s’avisse su ein sujet soi disant d’actualité eh, bé, ch’est cos pire et tant mieux. I d’a là qui dévers’tent leu venin, d’z’eautes qui align’tent les biestries mais pou cha i s’serv’tent d’ein pseudonyme, on n’sait pos qui ch’est, adeon i dis’tent d’z’affaires qui n’os’reotent me^me pos dire tout bas in public.

Dus qu’on s’in va….

Oauis, j’sais bin, mi avec j’signe d’ein pseudonyme, mais d’abord  i d’a bramint qui sav’tent bin qui ç’
que j’sus et puis on n’est fonqu’dix-huit au cabaret, adeon tant pire si te dis que ch’est ein d’mes comarates qui écrit des cacoules. D’toute facheon si ch’est pos li aujourd’hui, i-a des sanches que cha s’ra li l’prochain queop.

Mais si te veux ein p’tit queop d’beon temps bé…va su l’site du cabaret wallon, i a là des photos, des textes, des rinseign’mints ……….qu’heurus’mint qui a l’informatique pou pouvoir connaîte tout cha.

Ah, ouais, j’oblioeos ch’est www.cabaretwallon.be tout simplemint.

L’Picard d’ichi