2 décembre 2008 par L’Infant d’Tournai  

Bonjour, savez, mes gins.

J’voudreos vous parler aujord’hui d’eine séquoi qui m’déminche depuis bin lommint.

Et ch’t’in parlant l’sémaine passée avé m’bieau-garcheon, que ch’t’ein cinsier, qui m’a v’nu l’idée d’vous écrire tout quoisque j’in pinse.

I-a ein beon momint, quand ç’que l’prix du mazout i-a qu’minché à grimper, m’boulingère, que ch’t’eine brafe et jolie file, elle m’a anneonché que l’prix du pain i-alleot aurminter. Bin seûr, ch’éteot à causs’ du pétrole et rien d’éaute. « On n’sait pos cuire el pain sans cauffer l’four et comme l’mazout i coûte de pus in pus tchier, bé ch’est normal que l’prix d’orvient du pain i-aurminte ! » Quoisque te veux répeonte à cha ? On n’va tout n’même pos faire sans minger d’pain ? Et puis i n’a rien qui diminue, ch’est ç’qu’i feaut s’dire !

Et puis, l’cinsier, li aussi, i-a b’soin d’mazout pou s’tracteur. Adeon, l’prix du blé i deot bin seûr aurminter. Là cha n’est d’jà pus l’même ! Pasque les cinsiers on direot qu’i n’seont pos logés à l’même inseine que les éautes. Infin, cha ch’est pou l’pétite histoire.

Mais l’sémaine passée, m’bieau-garcheon i m’espliqueot que l’prix du blé i-aveot bin diminué. Et comme l’mazout i baisse aussi, je m’sus dit qu’j’alleos d’minder à m’boulingère si l’prix du pain i-areot fait comme l’blé et l’mazout ? Bé ahais, tins, là i n’a pos d’danger ! Final’mint, ch’est l’pain comme pou l’paquet d’frites, éné ? Quand les penn’tières i diminue’tent, l’prix du paquet d’frites i n’cange pos.

Dis, hardimint, on est toudis roulés…dins l’farine et j’pinse bin qu’l’Euro i n’a rien arringé à cha. Infin, cha ch’t’eine éaute histoire…

Allez, là-d’sus, à l’feos qui vient, mes gins.

L’Infant d’Tournai