5 décembre 2008 par  L’Infant d’Tournai   Magazine

Bonjour, savez, mes gins.

Z’avez vu qu’à Mons, no n’incien intraîneur i s’a fait foute à l’cour ! I feaut dire que d’après ç’que j’ai li dins les gazettes, i deveot faire face à des durtes tiêtes !

Infin, cha ch’est s’problème mais cha n’impêche que nous-éautes on l’aimeot bin tout n’même ! Mais ch’est li comme ein éaute, i trouv’ra bin ein éaute clup !

Je m’dis alfeos quand on veot tout cha, l’fotbal i-évolue pétête mais asteur i n’a pus d’plache pou les sintimints. Au jour d’aujord’hui, i n’a pus qu’eine cosse qui queompte : ch’est les liards ! L’côté « humain » du sport in général, i-est d’jà bin leon… Asteur quand on a l’occasieon d’gagner ein paire d’eureos d’puque, on s’in va jeuer dins l’villache d’à côté ! Et si à l’fin de l’saiseon, cha n’va pus, on va vir ailleurs ! Et pou l’s’intraîneus, te fais deux, treos mauvais résultats, on t’fout à l’cour ! Mais dùsqu’on s’in va ? Cha et l’mercato !

Infin, dins l’temps, t’commincheos eine saiseon avec eine équipe et t’alleos jusqu’au d’bout. Et si t’aveos des blessés, te tireos t’plan, t’n’aveos pos l’choix.

Asteur, si t’as des liards et que t’n équipe elle ne tourne pos trop reond à l’fin d’l’aînnée, te canches la mitan des jeueux et in janvier te t’ortrouèfes avec eine nouvelle équipe. Mais cha, je l’répète, ch’est seul’mint si t’as des liards. Si te n’d’as pos, te d’meures dins l’feond de l’série et te t’démènes avec les moyens du bord ou bin te déquinds ! Ch’est cha…l’évolutieon.

Hureus’mint, on n’deos pos cacher not’ joie d’vir no n’équipe tournaisienne qui s’défind bin dins ceulle deuxième divisieon, sans trop d’liards pétête mais sans histoire surtout !

L’ambiance elle est fin beonne dins l’noyeau et l’intraîneu i tient bin ses jeueux in mains. Et quand ej pinse qu’on a fait trimbler l’grand Anderlecht, i-a d’quoi d’ête fier des « Sang et Or », vous trouvez pos ?

Mais final’mint, tout ç’qu’on d’minde, ch’est qu’ceulle saiseon elle ne pose pos trop d’problèmes et qu’l’ainnée qui vient, on s’ra toudis in deuxième divisieon.

D’ici-là, bin seûr, on voudreot acor vife eine paire de belles fiêtes comme ceulle d’à ç’soir. Car, pour nous-éautes, orchevoir l’Antwerp au state Luc Varenne, ch’est tout n’même ein évén’mint. Que soiche l’Lierse, l’Brussels, Saint-Treond, Beveren ou acor les Anversois, ch’est toudis eine fiête et ein honneur. Quand on pinse qu’i-a n’paires d’ans, ch’est des équipes qui jeuot’tent in prumière divisieon ! Comme quoi, i-a alfeos des rêfes qui s’réalis’tent. Vlà l’matricule 26 qui s’frotte à des inciens ténors du fotbal belche !

Et tout ç’qu’on espère pour à ç’soir, ch’est qu’i-ara bramint d’gins pour incorager no n’équipe et qu’tertous insanne, on l’porte vers l’victoire !

Allez les « Sang et Or ». Allez TOURNAI

L’Infant d’Tournai