9 décembre 2008 par Clovis  

Cha y est ! Nous ovlà d’dins ! Les fiêtes i-eont comminchées et les illuminatieons i z’orviennent tout partout ! In ville bin seûr ! Et bin souvint ch’est fait avec goût. Pinsez à no Bieffreo par eximpe. Là où cha d’vient moins « normal » ch’est dins les campanes.

Début de l’ semaine, in allant dire bonsoir à des amisses, on a cait dins ein villache, je n’ vous dis qu’ cha ! La mitan  des maseons i’z’éteot’ent orcouvertes d’guirlandes et d’ jeux d’ leumières.

On s’ areot cru à Las Vegas. I-in aveot des ceulles que cha alleot. On éteot dins l’ginre « classique » : traîneaux, Père Noël,  sapins, crèches et baudets. Mais i d’aveot des ceusses franch’mint exotiques : j’ai vu des palmiers comme à Malibu, j’ai vu des fontaines qui n’ s’ reont jamais surgelées, j’ai vu des réverbères que les quervassins i n’ sareont jamais picher d’su ! J’ai vu des ours, des bambis, i manqueot des boas et des otaries et on s’areot cru au cirque ! M’ feimme et mi, on in est restés estampernés !

I-éteot  l’quart de siept heures et i f’seot clair comm in plein jour ! Et pos ein jour d’hiver éné, neon ein jour in juillet ! In p’tit queop pus leon, l’maseon d’ nos amisses, elle aveot l’air eine millette trisse avé s’ façade toute nue. Mais au moins, elle éteot originale et vu l’clarté qui f’seot, quand on a mis no carrette dins l’allée du garache, l’lumière de cour, elle ne s’a même pos allumée. « Ch’est toudis cha d’ gagné » qui a dit m’ copain Jean-Marie et « sans queompter tous les liards qu’on a mis d’côté in n’acatant pos tous ces bazars-là ».

Et ch’est vrai qu’in puque, cha coûte tchiers savez tous ces machins lumineux. Et comme inter visins i d’a qui jeut’tent à ceu qui d’ara l’ pus, ch’est tout bénéfice pou l’commerce et pou les vindeus d’ courant. Mais après les fiêtes, ces espécialisses de l’éclairache « a giorno », i s’reont pétète les prumiers à orclamer pus d’ pouvoir d’achat.

Mais bon, asteur nous ovlà d’jà éclairés su leus raiseons…

Clovis