Chanson d'Eugène Landrieu, membre fondateur de la CCWT en 1907. Pianiste du Cabaret jusqu'en 1935, il écrivit la musique et les paroles de cette chanson populaire tournaisienne.

Bonjour Marrain' ch'est mi qui viens vous anneoncher
Et à grand-père aussi que j' vas béteôt m' marier
Mo dieu, m' pétit garcheon, cha nous fét bin plaisi
Si on s' plaît inter vieux, on aim' les jeones aussi.
A t' baptêm' te bréieos, tins, j' m'in rappelle acor,
Pindant qu' tes larm's queureott'nt, mi, t' m'arroséos bin fort.
T' mamère elle in riéot
Pindant qu' grand-pèr' cantéot :

Refrain : 

Ch'est ainsin dins no ville,
Te n' saréos pos l' canger.
Prinds les garcheons, les filles,
Tout's tiêt's sous l' mêm' bonnet !

D'aussi leong qu' je m' souvienn', t'éteos ein p'tit bringand,
Te n'aveos pos t' parel pou jouer tous les plans:
Ein' feos t' mamère ell' dit : « Grand-pèr' tout tranquill'mint
» T'iras quère à l'école, à midi, no gamin ».
Mi, comm' j'éteos in r'tard, ej pass' pa l'ru' Clercamps ,
J'te veos sonner aux port' et bin vit' foute el camp.
T' mamère a berteonné,
Més mi j'li ai canté :   (au refrain).
 
Pus tard, t' n'as pos eu d' chanç', t'a fallu êt' soldat,
Dins l' temps ch'teot eine affair', à ç't' heur' ch'est pus rien d' cha !
Dins ein coin de m' commot' j'aveos bin mis d' côté
Ein' pétit' noirte loque et te d'as profité!
T' nous in récompinsas, braf' pétit garcheonnal
L' jour que te rapportas tes galeons d' caporal !
Et comm' grand-pèr' brayeot,
Ch' est ta qui li canteos :   (au refrain).
 
A l'occasieon d' tes noç's te n'aras pos d' cadéau,
Mais te n'y perdras pos, queusis ichi ç' qu'i t'féaut;
Avé grand-père hier nous l'aveons décidé
Et j' sus certain garcheon, qu' te vas ête inchanté,
Te veos ceull' vielle horloch', j' l'ai toudis connu' là
Ell' vient d' vos vieux parints, si t' veux che s'ra pour ta.
Te berch'ras tes infants
Au tic-tac in cantant :  (au refrain).