26 décembre 2008 par  Catoupii  Magazine

Z'avez seûr'mint vu à l' télé les imaches d' Bruches-Standard i-a eine paire de jours.  I feaut bin l'orconnaîte, même quand on n'est pos supporter, eul Standard i-est fort, surtout dins les matchs importants. Malhureus'mint, quand i jeut'tent queonte des p'tites équipes ou bin si l' match i n' sert à rien (comme à Stoutgarte), là i seont bin moins efficaces.

Dins l' feond, pétête que Tournai i-areot eu eine sanche de s' qualifier in coupe de Belgique si i-areot cait queonte les Liégeois.

J'orviens au match Bruches-Standard : par momint, cha orsanneot à n'eine bouch'rie, avé les féautes de Sonck et de Stijnen.  Sonck, i n'a foque orchu eine carte guéaune, et pourtant i-areot pouvu avoir eul rouche.  Stijnen, cha fait quate ou bin cheonq feos qu'i fait l' même sortie d' kamikasse. Vous s' rapp'lez d' Schoumakèr et Battiston à l' coupe du meonte ? Cha d'veot ête in quater-vingt-deux, à m' meote...  Eh bé Stijnen, li, i fait cha deux-treos feos par an, jusqu'au jour où i-invoira ein jeueu dins eine chaisse roulante.  Mais tout cha, cha n' li coûte que deux ou treos matches d' suspinsieon, et i-ara quand même es' plache dins l'équipe nationale tant que s' comarate Vandèrékèn i s'ra l' sélectionneu.

Par queonte, mi j'ai bin aimé ç' que l'intraineu du Standard i-a fait quand l'arbite i l'a mis déhors du terrain : i-a d'allé s'assir avé les surporters ed' Bruches, et i-a même mis eine écharpe d' Bruches autour de s' cou !  Tout cha dins l' beonne humeur, tertous i rigoleot bin dins l' tribune...

Et ç' qui-est l' pus étonnant (mi, j'in sus tout infouterfié), ch'est qu'i risque eine suspinsieon et eine aminte, pasque pour li aller dins ceulle tribune "brugeoisse", i li a fallu passer par au-d'zeur d'eine barrière.  In bref, i n'aveot pos l' dreot d'aller dins ceulle tribune, vu qu'elle éteot réservée à les Brugeois.

Ch'est ainsin à l'Unieon Belche : t'es plus puni pour eine bernette ainsin, ou bin si t'as rinvoyé ein papier in r'tard, que si te casses l' gampe d'ein jeueu d' l'éaute équipe.

I-a alfeos d' quoi ête dégoûté, à m' meote.  I n' reste qu'à espérer qu' tout i l'ira mieux in deux mille nouef, qu' cha soiche in fotbal, in politique (on est servi pou l' momint...), dins l' meonte, et dins nos portefouèles.

In attindant, comme i m'a dit m' garcheon l'éaute jour, "Le plus important, c'est le bien-être".  Comme eul vérité elle sort de l' bouque des infants, ch'est tout ç' que j' vous souhaite pou l'ainnée qui vient : du bien-être.

Beonne ainnée et beonne santé à tertous !  Et plein d' joie dins vos familes !

Catoupi