20 janvier 2009 par L’Picard d’ichi  

Adeon, les flonflons de l’fiête i seont éteints et l’cabaret i vient d’clôturer s’chint’naire. Mais i-a pos l’temps dire ouf et i s’a d’jà or’mis in route.

Les p’tits cabarets i-eont orpris saim’di passé et te peux acore aller les vire c’verdi au soir ou saimdi au soir à l’étache de la Halle aux draps mais attintieon, on a orpris l’traditieon, ch’est foqu’les heommes.
N’impêche, i a acor des projets tout plein et comme i a si bin dit Jean-Pierre Verbeke dans s’cancheon, « L’cabaret cant’ra toudis ».

Tins, tant qu’on i pinse, tertous i-a eine belle occasieon d’dire officiel’mint à no cabaret qu’on tient à li et qu’on l’aime bin.

Te sais qu’Nord Eclair et No Télé, i z’organistent ein votache pou l’Picard de l’ainnée, i-a là cheonq catégories et dins l’cheonquième, l’lette E, les divertiss’mints, eh bé dins les nominés comme i dis’tent, i-a l’Cabaret, ch’est l’luméro treos.

Ch’est d’jà ein honneur d’ête ainsin nominé, mais cha s’reot acore mieux d’arriver in tiête.

Alors, tant pire pou les ceusses qui direont qu’on profite d’ces colonnes (mais i n’a foqu’eine colonne quand même) pour faire no publicité, mais on vous l’dit quand même, vous pouvez, si vous nous aimez bin, si vous avez du plaisi à lire nos cacoules tous les mardis dins ceulle gazette,eh, bé, cha s’reot bin d’voter pou nous eautes, cha nous f’rait bin plaisi, ch’est pos difficile, ch’est E3 comme l’autoroute, l’autoroute des chint ans qui vienn’tent dusque l’Cabaret i continuera à canter Tournai, à faire vife l’actualité au seon d’ses cancheons, d’ses carabistoules et de s’n’ambiance.I feaut aussi voter pou les quate z’eautes catégories, mais comme on a eine masse d’amisses dins tous les ceusses qui seont nominés pou les sports, l’culture, l’société ,on n’voudreot po s’mette mal avec l’ein ou l’eaute, adeon, on laiche choisir à vo mote., mais pou l’divertis’mint, ch’est po l’même, on n’va quand même pos s’faire hara kiri même si au cabaret i d’ara qui rit chaque feos qui ven’reont. Allez, au queop qui vient in espérant qu’vous pins ‘rez à nous eautes (n’obliez pos  E3).

Pou savoir commint qui feaut s’y printe pou voter, eh, bé ch’est dins l’journal, su l’site du Nord Eclair, su l’ceul d’No Télé et même aussi su l’ceul du Cabaret.

Et…merci déjà

L’Picard d’ichi