27 janvier 2009 par L’Infant d’Tournai  

Bonjour, savez, mes gins.

Je n’sais pos si vous êtes comme mi mais asteur que les fiêtes elles seont passées, i-est pus que temps que j’pinse à faire régime. M’feimme elle me l’a d’ailleurs gintimint fait ormarquer quand ç’qu’on a été faire les soldes.

Quoisque vous voulez ? Les fiêtes, ch’est les fiêtes, éné ? Et comme on dit toudis qu’Tournai ch’est l’ville aux treos réveilleons et qu’on est des beons tournaisiens, on suit les traditieons.

I-a d’abord l’Noé avé ses r’pas à ralleonche dusque te minges l’foie gras, l’dinde, l’bûche et tout l’reste. Et i-in a qui après l’réveilleon, i-orcomminch’tent l’lindmain. Et avec toudis l’fameusse bûche. Bonjour l’cholestérol !

L’sémaine d’après, on est r’parti, vife l’nouvel-an ! Ch’n’est pus l’même, côté pluquache, mais cha n’est pos moins trisse ! Acor hureux qu’on dit que l’champane i n’est pos mauvais pou l’santé, tout comme el vin. Infin, à conditieon de n’pos exagérer bin seûr.

Arrivé là, on a acor eine sémaine pour s’ormette pasque qu’après cha, ch’est l’lapin qui n’a pos ein tournaisien qui voudreot l’manquer.

Et là nous-éautes, on l’fait deux queops : d’abord avec el’Cabaret l’sam’di d’avant et l’jour J avé d’s’amis ou in famille. Mais au Cabaret, on respecte l’traditieon, surtout pou l’menu : après l’apéritif, qui-est toudis l’binv’nu, on attaque l’saucisse et l’compote. Eine feos l’s’assiettes ramassées, l’lapin i-arrife avé les penn’tierres. Quand ç’qu’on a fini d’sacrifier eine paire de géants des flandres, on passe au mutieau et bin seûr l’fameusse salate tournaisienne. Et comme i nous reste acor eine pétite plache, on minge l’galette des Rois.

Après cha, on peut aller conte el’vint. Vous s’rindez queompte que quand les fiêtes elles seont passées, i-est temps d’orprinte s’n haleine.

Du queop, pindant ein momint, on va pinser à perte les kileos qu’on a amassés pindant les fiêtes. Tous l’s’ans ch’t’ainsin mais dins l’feond, vous trouvez pos qu’on a raiseon d’in profiter ? Après tout, on n’vit qu’eine feos, neon ?

Allez, mes gins, à l’feos qui vient.

L’Infant d’Tournai