10 février 2009 par L’orculeot  

J’ai à peine fini d’mette em’ main dins m’portefouelle avec les fiêtes ed’ fin d’ainnée , qu’ vlà qu’ j’orcheos ein paire de factures à payer pou l’ meos d’ féverrier.

Tous l’z’ans, ch’est l’même : j’orcheos eine paire de douloureusses. D’abord cha comminche par l’asseurance de m’ carette. Cha aurminte toudis et cha n’diminue jamais !.I a  toudis eine paire de p’tites taxes in puque.

N’impêche que l’nouvieau système « Bonus Malus », ch’t’eine riche invintieon. D’sus l’ facture qu’ j’ai orchue i-étéot marqué : « Bravo, …. Vous avez droit à votre Bonus Bonus… For Ever !, cela fait à présent deux ans, voire plus »( et in puque ch’est écrit comme-i feaut ) « que vous êtes assuré au Bonus Malus 0. Deux ans durant lesquels vous n’avez causé aucun accident en tort » (deux ans ! Mais cha fait vingt qu’j’ai eine carette et que j’nai jamais eu d’accidint !!!!! ) « cela mérite  une récompense ! nous vous garantissons le maintien de votre Bonus Malus au degré O… et du tarif le plus avantageux malgré deux accidents en tort !. ».............. et patati et patata ….

Bé ch’est vraimint l’meonte à l’inviers ! Avant quand te t’conduiseos bin ,  t’étéos récompinsé. Asteur ch’est l’cantraire, on t’dit tout d’eine : «  t as pos fait à r’bours , bé t’est pos comme ein eaute, vas y te peux faire à r’bours … » Je l’dis acoer ein queop, bé ch’est l’meonte à l’inviers.  J’voudreos  bin vir eul’ tiête de m’ n’heomme que j’vas li orfuser l’priorité d’ droite quand j’vas li dire « ch’n’est rien d’ cha , j’ai acore eul’ dreot à deux accidints ! »  Et si cha cait  i’m’ dira «  bé mi aussi !!!!! »

Tins bé l’ov’là, asteur, ch’est ainsin, l’ceu  qui n’a rien à s’ orprocher, qui respecte l’z’eautes et qui s’conduit bin,  et qui conduit bin , ch’est normal !. L’ceu qui a l’habitute ed’ faire à r’bours et qui pou ein queop, i ‘n’ fait pos à ‘r’bours, bé c’ti là, ch’est vraimint, mais vraimint quéqu’ein d’ bien. !!

L’orculeot