Semaine 9 2009 par Pichoulit.  

Chaque queop qu' t’ouvères t’passetoutoute et qu’te t' rues su l’artique du cabaret, te n’peux pos t’imaginer tout quoisqu’i-a là pa-d’rière.

Pasque pou arriver à avoir ein artique tous les s’maines, eh, bé i-a des queops qu'i feaut bin carpinter.

Pindant cheonq ainnées tout plein, i d’a ein qui s’a  esquinté pou qu’ tertous i peut avoir bin d’l’amus’mint à lire no cacoules. Et ç’compagneon i-a décidé d’passer l’main et on n’voudreot pos passer sous silince tout l’ouvrache qu'i-a là fait.

D’abord, i feaut faire ein calinderrier qu'i d’a qui respectent et d’z'eautes qui l’pertent, après cha i feaut queurir après l’z’artiques pou arriver à temps pou l’impressieon et même qu’alfeos i-a deux artiques qui arrif’tent in même temps et qu'i faut queuzir l’pus pressant pasque pétête que l’sémaine d’après, l’sujet i s’ra d’jà orcait.

Et puis i-a des s’maines que l’artique i n’arrife pos alors à ç’moumint-là, no n'amisse  Cloluche (pasque ch’est li qui organiseot tout cha pou nous z’eautes) i-aveot eine banse d’inciens « Infants d’Tournai » dusqu’i-alleot querre eine idée qui r’metteot au goût du jour.

D’eautes queops i r’tapeot tout à l’ordinateur pasqu'i-aveot perdu l’fichier ou qui n’saveot pos l’ouvère et puis i s’in alleot jusqu’à l’drèfe de Maire porter l’artique pasque i n’aveot pos su l’invoyer avé s’n’ordinateur qui-éteot pus souvint in panne qu’à s’tour.

Ch’est vrai, qu'i-est pinsieonné (d’puis l’ temps) mais comme i n’arrête jamais d’ouvrer ch’est comme si qu'i s'reot acore dins l’vie actife.

Après cheonq ainnées d’beons et loyaux services, i nous a d’mindé d’printe l’relais.

Adeon on a fait eine nouvelle équipe et ch’est Catoupi qui va asteur organiser les parutieons dins vo Passetoutoute.

L’équipe elle est in plache et comme chez nous z’eautes i n’a pos d’mercato ni d’transfert, vous pouvez d’ête seurs qu’on va ête fidèles... sineon Catoupi i va s’dém’ner.

Ainsin vous allez ortrouver Catoupi, Du Beos d’chuque, Pichoulit, Arnitoile, Clovis et d’z’eautes acore qui vont s’relayer (Cloluche i va bin seûr acore faire ed'z'artiques, comme es'n'amisse Popol), vous allez ortrouver vos meots croisés d’GDO Hédéba ou acore l’pleume acerpe des mimpes du Cabaret quand l’bourguémette, l’évêque ou l’minisse d’cha ou d’eaute queosse i fait à r’bours.

Pasque les gins du Cabaret, si i cantent souvint i seont souvint aussi à leu n’ordinateur pou rimplir des chroniques dins Passetoutoute, dins Nord Eclite tous les mardis, ou acore dins l’gazette d’no n’amisse Michel Foucart à Technord et même dins l’gazette des Sang et Or (là ch’est L’infant d’Tournai qui rassimble les artiques et qui les deonne à l’imprimeu... quand i n’canche pos) sans oblier no newsletter (ah ouais, on sait aussi parler ainsin)  à les ceusses qui s’seont abonnés (ch’est pou rien) su no site www.cabaretwallon.be et qu’elle s’appelle « Queu nouvelle »

Vous veyez les amisses qu’on s’ra toudis au rindez-vous.

Mais avant d’mette l’point final à ceulle artique, j’voudreos à no neom à tertous au Cabaret mais aussi à vo neom à vous, les lecteurs, dire ein tout grand merci à Cloluche pou tout l’ouvrache qui a fait pindant cheonq ainnées pou vous asseurer d’ête au rindez-vous.

Ouais, on peut l’dire…merci Cloluche, merci André.

Pichoulit.